سلامتی کونسل میں چینی مندوب نے کہا ہے کہ امریکا ایران پر طاقت کے استعمال کی کوشش فوری طور پر ترک کرے، اور چین دنیا کو جنگل کے قانون کی طرف دھکیلنے کی مخالفت کرتا ہے۔
اقوام متحدہ کی سلامتی کونسل کے اجلاس سے خطاب کرتے ہوئے چینی مندوب نے کہا کہ امریکا مسلسل ایران کو طاقت کے استعمال کی دھمکیاں دے رہا ہے، جس کے باعث مشرق وسطیٰ میں ایک اور جنگ کے خطرات منڈلا رہے ہیں۔
انہوں نے کہا کہ امریکا ایران پر طاقت کے استعمال کی کوشش فوری ترک کرے کیونکہ چین ایسے کسی بھی طرز عمل کا مخالف ہے جو عالمی نظام کو جنگل کے قانون کی طرف لے جائے۔
چینی مندوب نے مزید کہا کہ چین کسی بھی ملک کی خودمختاری اور سالمیت کے خلاف طاقت کے استعمال کی مخالفت کرتا ہے، اور چاہتا ہے کہ تمام مسائل کا حل اقوام متحدہ کے چارٹر اور عالمی قوانین کے مطابق نکالا جائے۔
چینی مندوب کا کہنا تھا کہ ایران ایک خودمختار ملک ہے اور ایرانی عوام کو اپنے فیصلے خود کرنے کی مکمل آزادی ہونی چاہیے۔ انہوں نے کہا کہ ایران کو درپیش مسائل سے نمٹنے کے لیے عالمی برادری کو تعمیری کردار ادا کرنا چاہیے۔
دوسری جانب چینی وزیر خارجہ وانگ ای نے ایرانی وزیر خارجہ عباس عراقچی سے ٹیلیفونک گفتگو بھی کی، جس میں انہوں نے اس یقین کا اظہار کیا کہ ایرانی حکومت اور عوام متحد رہیں گے اور موجودہ مشکلات پر قابو پا لیں گے۔
