پی ایس ایل: چیئرمین پی سی بی محسن نقوی نے کھلاڑیوں کے معاوضے بڑھانے کی وکالت کر دی
لاہور: پاکستان کرکٹ بورڈ کے چیئرمین محسن نقوی نے پی ایس ایل کی گورننگ کونسل کے اجلاس میں کھلاڑیوں کے معاوضوں میں اضافہ کرنے کی بھرپور وکالت کی ہے۔
ذرائع کے مطابق اجلاس میں محسن نقوی نے ٹیم مالکان کو مشورہ دیا کہ ٹیموں کی مارکیٹ ویلیو بڑھنے کے بعد اب کھلاڑیوں کے معاوضوں میں بھی اضافہ کیا جائے۔ انہوں نے یہ بھی کہا کہ پی ایس ایل 11 کے ڈرافٹ میں کھلاڑیوں کی آزادانہ انتخاب (آکشن) کرائی جائے تاکہ کھلاڑی اپنی پسند کی ٹیم کے ساتھ شامل ہو سکیں اور انہیں زیادہ فائدہ ہو۔
چیئرمین نے زور دیا کہ دو نئی ٹیموں کو بھی کھلاڑی چننے کے یکساں مواقع فراہم کیے جائیں۔ ورکنگ کمیٹی کے اجلاس میں پرانی ٹیموں کی جانب سے کھلاڑیوں کی ری ٹینشن پر بات چیت کا امکان ہے۔
گزشتہ روز ہونے والے اجلاس میں 8 فرنچائز، پی سی بی اور پی ایس ایل حکام نے شرکت کی اور دو نئی ٹیموں کے مالکان کو خوش آمدید کہا گیا۔ محسن نقوی نے نئی ٹیموں کی کامیاب نیلامی پر پی ایس ایل ٹیمز کو مبارکباد بھی دی۔
