بالی وڈ: مرونال ٹھاکر اور دھنوش کی شادی کی افواہیں گرم
ممبئی: بھارتی میڈیا میں بالی وڈ اداکارہ مرونال ٹھاکر اور اداکار دھنوش کی شادی کی افواہیں زور پکڑ گئی ہیں۔ غیر مصدقہ اطلاعات کے مطابق دونوں 14 فروری کو نجی تقریب میں شادی کے بندھن میں بندھ سکتے ہیں، جس میں صرف قریبی اہل خانہ اور دوست شامل ہوں گے۔
تاہم اب تک نہ تو دونوں اداکاروں اور نہ ہی ان کی ٹیموں کی جانب سے ان خبروں کی تصدیق یا تردید کی گئی ہے۔ خبر اس لیے بھی توجہ کا مرکز بنی ہوئی ہے کہ دونوں نے اپنی ذاتی زندگی کو عوامی نظروں سے دور رکھنے کی کوشش کی ہے۔
چند ماہ قبل بھی افواہوں کا بازار گرم ہوا تھا کہ مرونال اور دھنوش رشتہ میں ہیں، لیکن مرونال نے واضح کیا تھا کہ دھنوش صرف ایک اچھے دوست ہیں۔ ان افواہوں کی ابتدا اس وقت ہوئی جب فلم سن آف سردار 2 کی اسکریننگ کے دوران ایک مبینہ ویڈیو وائرل ہوئی، جس میں دونوں ایک دوسرے کا ہاتھ تھامے اور سرگوشیاں کرتے دکھائی دیے۔ مزید برآں، مرونال نے دھنوش کی بہنوں کو انسٹاگرام پر فالو کرنا شروع کیا، جس نے قیاس آرائیوں کو مزید ہوا دی۔
یاد رہے کہ سال 2022 میں اداکار دھنوش اور ان کی اہلیہ ایشوریا رجنی کانتھ نے شادی کے 18 سال بعد علیحدگی اختیار کی تھی۔
