اسلام آباد: وزیرداخلہ محسن نقوی سے امریکی وفد کی ملاقات، سکیورٹی تعاون پر تبادلہ خیال
اسلام آباد: وزیرداخلہ محسن نقوی سے قائم مقام امریکی سفیر نیٹلی بیکر کی سربراہی میں امریکی وفد نے ملاقات کی، جس میں پاک امریکا تعلقات اور مشترکہ مفادات کے شعبوں میں تعاون بڑھانے پر تفصیلی بات چیت ہوئی۔
ملاقات کے دوران دونوں فریقین نے دوطرفہ سکیورٹی تعاون، بارڈر مینجمنٹ، نارکوٹکس کنٹرول اور انسداد دہشت گردی کے شعبوں میں اشتراک بڑھانے پر اتفاق کیا۔ مستقبل میں ہر سطح پر تعاون مضبوط بنانے اور کوآرڈینیشن بہتر بنانے کا بھی فیصلہ کیا گیا۔
وزیرداخلہ محسن نقوی نے کہا کہ ایف آئی اے، ایف سی اور نیشنل سائبر کرائمز انویسٹی گیشن ایجنسی کے افسران کے لیے تربیتی پروگرامز پر بات ہوئی اور بیرون ملک جرائم میں ملوث افراد کی نشاندہی جدید سافٹ ویئر کے ذریعے کی جائے گی۔ امریکی تعاون سے ایف آئی اے میں سینٹر فار ٹرانسفارمیشن کرائم اور اکیڈمی کے قیام پر بھی غور کیا گیا۔
ملاقات میں بارڈر سکیورٹی اور کوسٹل گارڈز کو جدید امریکی آلات سے لیس کرنے پر بھی اتفاق ہوا، جس سے ان کی استعداد کار میں اضافہ ہوگا۔ وزیرداخلہ نے کہا کہ ایف سی اور این سی سی آئی اے کی استعداد کار بڑھانے میں امریکی تعاون کا خیرمقدم کیا جائے گا اور ایف آئی اے انسداد دہشت گردی ونگ کو فعال کرنے کے لیے امریکی معاونت فائدہ مند ہوگی۔
قائم مقام امریکی سفیر نے وزارت داخلہ اور امریکی اداروں کے ساتھ جاری تعاون کو سراہا اور کہا کہ پاکستان کے ساتھ دوطرفہ اشتراک بڑھانے کے لیے اقدامات جاری رکھیں گے۔
ملاقات میں وزیر مملکت داخلہ طلال چودھری، وفاقی سیکرٹری داخلہ، ڈی جی ایف آئی اے، کمانڈنٹ ایف سی، ایڈیشنل سیکرٹری داخلہ، ڈی جی نیشنل سائبر کرائمز، ڈی جی پاسپورٹ اینڈ امیگریشن، آئی جی اسلام آباد اور دیگر اعلیٰ حکام بھی موجود تھے۔
