انڈر 19 کرکٹ ورلڈ کپ میں سری لنکن بیٹر ویران چامودیتھا نے شاندار کارکردگی کا مظاہرہ کرتے ہوئے ایونٹ کی تاریخ کا سب سے بڑا انفرادی اسکور بنا کر نیا ورلڈ ریکارڈ قائم کر دیا۔
ہفتے کے روز آئی سی سی مینز انڈر 19 کرکٹ ورلڈ کپ میں سری لنکا اور جاپان کے درمیان کھیلے گئے میچ میں ویران چامودیتھا نے نامیبیا کرکٹ گراؤنڈ پر بیٹنگ کا ایسا مظاہرہ پیش کیا جو تاریخ میں ہمیشہ یاد رکھا جائے گا۔
ویران چامودیتھا نے جاپان کے خلاف 143 گیندوں پر 192 رنز کی شاندار اور دلکش اننگز کھیلی، جو انڈر 19 ورلڈ کپ کی تاریخ کا سب سے بڑا انفرادی اسکور ہے۔ اس یادگار اننگز میں انہوں نے 26 چوکے اور ایک شاندار چھکا لگایا، جس سے شائقین کرکٹ خوب محظوظ ہوئے۔
اس کارنامے کے ساتھ ہی ویران چامودیتھا نے اپنے ہی ہم وطن کھلاڑی ہسیتھ بویاگوڈا کا 2018 میں کینیا کے خلاف بنایا گیا 191 رنز کا ریکارڈ توڑ دیا، جو کئی برسوں سے قائم تھا۔
میچ کے دوران ویران چامودیتھا کو اپنے اوپننگ پارٹنر دیمانتھا مہاویتانا کی بھرپور معاونت حاصل رہی۔ دونوں کھلاڑیوں کے درمیان 328 رنز کی شاندار اوپننگ شراکت قائم ہوئی، جو آئی سی سی مینز انڈر 19 کرکٹ ورلڈ کپ کی تاریخ میں کسی بھی وکٹ کے لیے سب سے بڑی شراکت ہے۔
اس ریکارڈ ساز شراکت کی بدولت سری لنکا انڈر 19 ٹیم نے مقررہ 50 اوورز میں جاپان کے خلاف 387 رنز کا بڑا مجموعہ اسکور کیا، جو جاپان کے نوجوان کھلاڑیوں کے لیے ایک مشکل ہدف ثابت ہوا۔
ہدف کے تعاقب میں جاپان کی انڈر 19 ٹیم مقررہ اوورز میں 8 وکٹوں کے نقصان پر صرف 184 رنز ہی بنا سکی۔ یوں سری لنکا انڈر 19 ٹیم نے میچ 203 رنز کے بھاری مارجن سے جیت لیا۔
یہ فتح اور ویران چامودیتھا کی ریکارڈ ساز اننگز نہ صرف سری لنکا کرکٹ بلکہ انڈر 19 ورلڈ کپ کی تاریخ میں ایک سنہری باب کے طور پر یاد رکھی جائے گی۔
