سعودی عرب میں دہشت گردی کے الزامات ثابت ہونے پر تین افراد کو سزائے موت سنا دی گئی ہے۔
سعودی میڈیا کے مطابق جن افراد کو سزائے موت سنائی گئی، ان میں حسین بن سالم بن محمد العمری، سعود بن ہلیل بن سعود العنزی اور بسام محسن مران السبیعی شامل ہیں۔
سیکیورٹی اداروں نے تحقیقات مکمل کرنے کے بعد تینوں افراد کو گرفتار کیا، جس کے بعد کیس خصوصی عدالت میں پیش کیا گیا۔ عدالت نے شریعت اور سعودی قوانین کے تحت تینوں ملزمان کو سزائے موت سنائی۔
سعودی وزارت داخلہ کے مطابق تینوں افراد سیکیورٹی فورسز کی گاڑیوں میں دھماکہ خیز مواد نصب کرنے، اہلکاروں کو قتل کرنے کی کوشش اور دہشت گرد عناصر کو پناہ فراہم کرنے جیسے سنگین جرائم میں ملوث تھے۔
وزارت داخلہ نے اپنے بیان میں واضح کیا کہ معاشرے کے امن اور استحکام کو نقصان پہنچانے کی کسی بھی کوشش کو کسی صورت برداشت نہیں کیا جائے گا۔
