بگ بیش لیگ میں آسٹریلوی کرکٹر اسٹیو اسمتھ اور بابر اعظم کے درمیان رن نہ لینے کا معاملہ تاحال آسٹریلوی میڈیا میں زیرِ بحث ہے۔
آسٹریلوی میڈیا کے مطابق اسٹیو اسمتھ کے رویے سے بابر اعظم نے بے عزتی محسوس کی اور وہ غصے میں آ گئے۔ میچ ختم ہونے کے بعد سڈنی سکسرز کے بابر اعظم چینجنگ روم میں ہی رہے اور کسی سے نہیں ملے۔
آسٹریلوی میڈیا کا کہنا ہے کہ بابر اعظم سڈنی کرکٹ گراؤنڈ میں سڈنی تھنڈر کے کھلاڑیوں سے ہینڈ شیک کے لیے بھی نہیں آئے۔ رپورٹ کے مطابق بابر اعظم نے خود کو ساتھی کھلاڑیوں سے الگ کر لیا تھا اور انہوں نے حیران کن غصے کا مظاہرہ کیا، جبکہ اس دوران کوچ نے بھی ان سے بات کرنے کی کوشش کی۔
آسٹریلوی میڈیا کا دعویٰ ہے کہ اسٹیو اسمتھ نے بابر اعظم کو دسویں اوور میں ہی بتا دیا تھا کہ وہ پاور سرج اوور کی پہلی گیند کھیلیں گے۔ اسٹیو اسمتھ نے اس اوور میں 32 رنز بنائے، تاہم بابر اعظم نے اس کارکردگی پر خوشی کا اظہار نہیں کیا۔
سابق آسٹریلوی کرکٹر مارک وا نے بابر اعظم کی جانب سے آؤٹ ہونے کے بعد باؤنڈری کو بیٹ مارنے پر تبصرہ کرتے ہوئے کہا کہ آپ کچھ بھی محسوس کر رہے ہوں، اس کا اظہار نہ کریں کیونکہ یہ ٹیم کے ماحول کے لیے اچھا نہیں ہوتا۔ مارک وا نے کہا کہ انہیں معلوم نہیں بابر اعظم کہاں چلے گئے تھے، لیکن میچ کے بعد گراؤنڈ میں واپس نہ آنا اچھا نہیں لگا۔ ان کے مطابق بابر اعظم کو خوش ہونا چاہیے تھا کہ ٹیم کے لیے حکمتِ عملی کامیاب رہی۔
سابق انگلش کپتان مائیکل وان اور سابق آسٹریلوی کرکٹر ایڈم گلکرسٹ نے بھی بابر اعظم کو اس معاملے میں غلط قرار دیا۔
مائیکل وان کا کہنا تھا کہ ٹیم اسپورٹ میں بعض اوقات ایسے فیصلے ہوتے ہیں جو کھلاڑی کو اچھے نہیں لگتے، لیکن ٹیم کے مفاد کو ترجیح دینی ہوتی ہے۔
ایڈم گلکرسٹ نے کہا کہ انہیں یہ سب دیکھ کر مایوسی ہوئی۔ ان کے مطابق بابر اعظم ایک کلاس پلیئر ہیں اور ٹورنامنٹ میں شاندار کارکردگی دکھا رہے ہیں، تاہم جس انداز میں وہ آؤٹ ہو کر باہر گئے، اس سے یہ سوال پیدا ہوتا ہے کہ انہوں نے گراؤنڈ میں موجود بچوں کو ٹیم ورک اور اسپورٹس مین شپ کا کیا پیغام دیا۔
دوسری جانب بگ بیش لیگ کے نئے میچ سے قبل پری میچ گفتگو میں کمنٹیٹر ایشا گوہا نے اسٹیو اسمتھ سے سوال کیا کہ کیا ان کے اور بابر اعظم کے معاملات اب ٹھیک ہو گئے ہیں۔
اس پر اسٹیو اسمتھ نے ہنستے ہوئے جواب دیا کہ انہوں نے آپس میں بات کر لی ہے، بابر اعظم نے اس رات اچھی بیٹنگ کی تھی اور دونوں کے درمیان گولف پر بھی گفتگو ہوئی، جو اسکرین پر دیکھی جا سکتی ہے۔
اسٹیو اسمتھ کا مزید کہنا تھا کہ پچ اچھی دکھائی دے رہی ہے اور انہیں امید ہے کہ اس میچ میں بھی اچھی کارکردگی دکھائیں گے۔
