مراکش کے بادشاہ نے امریکی صدر ڈونلڈ ٹرمپ کی جانب سے غزہ امن بورڈ کی بانی رکنیت کی دعوت قبول کر لی ہے۔
مراکش کی وزارت خارجہ کے جاری کردہ بیان کے مطابق بادشاہ مراکش نے غزہ امن بورڈ میں بطور بانی رکن شامل ہونے پر باضابطہ رضامندی ظاہر کی ہے۔ بیان میں کہا گیا ہے کہ اس بورڈ کا بنیادی مقصد مشرق وسطیٰ میں امن کے قیام اور خطے میں جاری تنازعات کے حل کے لیے عالمی سطح پر کوششوں کی حمایت کرنا ہے۔
وزارت خارجہ کے مطابق غزہ امن بورڈ میں محدود تعداد میں منتخب بین الاقوامی رہنما شامل ہوں گے، جو مشرق وسطیٰ میں طویل المدتی استحکام، امن اور خوشحالی کے لیے سنجیدہ اور پرعزم کردار ادا کریں گے۔ ان رہنماؤں سے توقع کی جا رہی ہے کہ وہ سیاسی، سفارتی اور انسانی بنیادوں پر امن کے فروغ کے لیے مشترکہ حکمت عملی ترتیب دیں گے۔
بیان میں مزید کہا گیا ہے کہ مراکش غزہ امن بورڈ کے آئینی چارٹر کی توثیق کرے گا اور مشرق وسطیٰ میں ایک جامع، منصفانہ اور دیرپا امن کے قیام کے عزم کا اعادہ کرے گا۔ مراکش نے اس بات پر زور دیا کہ خطے میں امن کے لیے بین الاقوامی تعاون، مکالمہ اور سفارتی حل ناگزیر ہیں۔
مراکش کی وزارت خارجہ کا کہنا ہے کہ بادشاہ کی جانب سے اس بورڈ میں شمولیت عالمی سطح پر امن کی کوششوں میں مراکش کے فعال کردار اور مشرق وسطیٰ میں امن و استحکام کے لیے اس کے دیرینہ مؤقف کی عکاس ہے۔
