امریکا میں ایک نئی تاریخ رقم ہو گئی ہے، جہاں پہلی مسلم نائب گورنر خاتون غزالہ ہاشمی نے قرآنِ پاک پر اپنے عہدے کا حلف اٹھا لیا۔
ریاست ورجینیا کی تاریخ میں پہلی مرتبہ گورنر کا عہدہ بھی ایک خاتون رہنما نے سنبھالا، جہاں سابق رکن کانگریس ایبی گیل اسپین برجر نے بطور گورنر ذمہ داریاں سنبھال لیں۔ اسی تقریب میں ورجینیا کی تاریخ کا ایک اور اہم سنگِ میل بھی عبور کیا گیا، جہاں اٹارنی جنرل کا عہدہ پہلی بار سیاہ فام رہنما جے جونز نے سنبھالا۔
لیفٹیننٹ گورنر کے عہدے پر فائز ہونے والی غزالہ ہاشمی نہ صرف ریاست کی پہلی مسلم نائب گورنر ہیں بلکہ وہ اس منصب پر پہنچنے والی پہلی خاتون بھی ہیں۔ حلف برداری کی تقریب کے موقع پر بین المذاہب ہم آہنگی کو فروغ دینے کے لیے انٹرفیتھ پریئر بریک فاسٹ کا بھی اہتمام کیا گیا، جس میں امام شریف نے خصوصی دعا کرائی۔
تقریب میں مختلف سیاسی اور سماجی شخصیات نے شرکت کی، جن میں سینیٹر صدام ازلان سلیم اور سینیٹر کنعان بھی شامل تھے۔ اس موقع پر ایڈمز اسکاؤٹنگ امریکا اور گرلز اسکاؤٹس کی جانب سے پریڈ بھی منعقد کی گئی، جس کی قیادت رضوان جاکا، احسن اللّٰہ، بیتھنی رشید اور دیگر نے کی۔
تقریب سے خطاب کرتے ہوئے رضوان جاکا نے اس امید کا اظہار کیا کہ نئی قیادت ریاست میں اتحاد، شمولیت اور تنوع کو مزید فروغ دے گی۔ انہوں نے کہا کہ یہ پیش رفت امریکا میں اقلیتی برادریوں کے لیے ایک مثبت پیغام ہے۔
ریاستی گورنر کے ایشین امریکن ایڈوائزری بورڈ کے چیئرمین منصور قریشی نے بھی اس موقع پر توقع ظاہر کی کہ نہ صرف گورنر اور لیفٹیننٹ گورنر بلکہ پوری کابینہ ورجینیا میں بلا تفریق عوام، بالخصوص جنوبی ایشیائی کمیونٹی کی خدمت کے لیے مؤثر کردار ادا کرے گی۔
ان کا کہنا تھا کہ یہ تاریخی حلف برداری امریکا میں تنوع، مذہبی آزادی اور مساوی نمائندگی کی ایک روشن مثال ہے، جو مستقبل میں مزید مثبت تبدیلیوں کا پیش خیمہ ثابت ہو سکتی ہے۔
