کراچی: گل پلازہ کی ہولناک آتشزدگی، جاں بحق افراد 26 اور لاپتہ 83 ہو گئے
کراچی کے مصروف ایم اے جناح روڈ پر واقع شاپنگ مال گل پلازہ میں پیش آنے والے المناک آتشزدگی کے واقعے میں اب تک 26 افراد جاں بحق اور 83 افراد لاپتہ ہیں۔ واقعے کے بعد ریسکیو اہلکار جلی ہوئی عمارت کے بیشتر حصوں میں داخل ہو کر سرچ اینڈ ریسکیو آپریشن جاری رکھے ہوئے ہیں جبکہ ملبہ ہٹانے کا کام بھی مسلسل جاری ہے۔
آگ سے متاثرہ گل پلازہ کا ایک اور حصہ زمین بوس ہو گیا ہے، جبکہ آس پاس کی عمارتیں بھی متاثر ہوئیں اور ان کے پلرز ٹیڑھے ہو گئے، جس کے باعث خطرہ برقرار ہے۔
ڈپٹی کمشنر ساوتھ آفس میں لاپتہ افراد کی فہرست آویزاں کر دی گئی ہے۔ 12 افراد کے اضافے کے بعد لاپتہ افراد کی مجموعی تعداد 83 ہو گئی ہے، جبکہ 29 افراد کی موبائل لوکیشنیں گل پلازہ کے اطراف سے موصول ہو رہی ہیں۔
گل پلازہ میں جاں بحق ہونے والے 26 افراد میں سے 18 کی شناخت ہو چکی ہے، جبکہ لاپتہ افراد کے اہل خانہ کو سول اسپتال میں اپنے ڈیٹا اور ڈی این اے نمونے جمع کرانے کی ہدایت کی گئی ہے تاکہ لاشوں کی شناخت جلد ممکن بنائی جا سکے۔
پولیس سرجن ڈاکٹر سمعیہ طارق کے مطابق اب تک 20 لاشوں کے ڈی این اے سیمپلز حاصل کیے جا چکے ہیں، جبکہ 48 خاندانوں نے اپنے ڈی این اے سیمپلز بھی جمع کرا دیے ہیں۔ ڈی آئی جی ساوتھ اسد رضا نے بتایا کہ یہ نمونے سندھ فرانزک ڈی این اے لیبارٹری، جامعہ کراچی بھیجے جا رہے ہیں، اور آئندہ تین دنوں تک کراس میچنگ کا عمل جاری رہے گا۔
ادھر سندھ فرانزک لیب کو 6 لاشوں کے نمونے موصول ہو گئے ہیں جبکہ ناقابل شناخت 6 لاشیں ایدھی سردخانے سہراب گوٹھ منتقل کر دی گئی ہیں تاکہ مزید کارروائی ممکن ہو سکے۔
دوسری جانب، گل پلازہ میں آگ لگنے کے واقعے سے متعلق تحقیقاتی کمیٹی کا اجلاس آج طلب کیا گیا ہے، جس میں حادثے کے تمام جمع شدہ ڈیٹا کا تفصیلی جائزہ لیا جائے گا اور عمارت کی حفاظتی خامیوں، انتظامی غفلت اور دیگر وجوہات کی تحقیقات کی جائیں گی تاکہ ذمہ داروں کے خلاف قانونی کارروائی کی جا سکے۔
