اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے شمالی علاقوں میں متوقع بارشوں اور برفباری کے حوالے سے الرٹ جاری کر دیا ہے۔
این ڈی ایم اے کا کہنا ہے کہ 21 سے 24 جنوری کے دوران شمالی علاقہ جات میں بارش اور برفباری کے باعث ندی نالوں میں طغیانی کا خدشہ ہے۔ بالائی علاقوں میں شدید برفباری اور بارش کے نتیجے میں دریائے کابل اور اس سے ملحقہ ندی نالوں میں اچانک طغیانی آ سکتی ہے۔
اتھارٹی کے مطابق دیر، چترال، سوات اور کوہستان کے علاقوں میں بھی اچانک سیلابی صورتحال پیدا ہونے کا امکان ہے۔ اسی طرح نوشہرہ اور تربیلا ڈیم کے نشیبی علاقوں میں دریائے کابل کے بہاؤ میں اضافے کا خدشہ ظاہر کیا گیا ہے۔
این ڈی ایم اے نے صوبائی اور ضلعی انتظامیہ کو ہائی الرٹ رہنے کی ہدایت کرتے ہوئے کہا ہے کہ عوام ندی نالوں، نشیبی علاقوں اور خطرے سے دوچار مقامات کے قریب غیر ضروری آمد و رفت سے گریز کریں اور حفاظتی ہدایات پر عمل کریں۔
دوسری جانب بلوچستان کے بیشتر اضلاع میں بدھ کے روز سے بارش اور برفباری کا امکان ظاہر کیا گیا ہے۔ محکمہ موسمیات کے مطابق زیارت، چمن، پشین، قلعہ عبداللہ، قلعہ سیف اللہ اور قلات میں بارش اور برفباری ہو سکتی ہے۔
محکمہ موسمیات نے نوشکی، ہرنائی، ژوب اور موسیٰ خیل میں تیز ہواؤں کے ساتھ بارش کی پیش گوئی بھی کی ہے، جبکہ بارکھان، سبی، لورالائی، موسیٰ خیل، کیچ، گوادر، لسبیلہ، آواران اور چاغی میں بھی بارش کا امکان ہے۔
