امریکی فوج نے وینزویلاکے تیل سے منسلک ایک اور جہاز قبضے میں لے لیا

واشنگٹن: امریکی فوج نے کیریبین کے علاقے میں وینزویلا کے تیل سے منسلک ایک اور جہاز پر قبضہ کر لیا ہے۔

امریکی میڈیا کے مطابق امریکی فوجی دستوں نے منگل کے روز وینزویلا کے تیل سے منسلک ساتواں جہاز اپنی تحویل میں لیا۔ یہ کارروائی ایسے وقت میں کی گئی ہے جب ٹرمپ انتظامیہ جنوبی امریکی ملک وینزویلا کے تیل کے شعبے پر کنٹرول حاصل کرنے کی کوششیں جاری رکھے ہوئے ہے۔

رپورٹس کے مطابق یہ اقدام امریکا کی جانب سے وینزویلا کے خلاف جاری اقتصادی اور تزویراتی دباؤ کا حصہ قرار دیا جا رہا ہے، جس کے تحت تیل کی ترسیل اور برآمدات کو نشانہ بنایا جا رہا ہے۔

امریکی سدرن کمانڈ نے سوشل میڈیا پر جاری ایک بیان میں بتایا کہ امریکی فورسز نے موٹر ویسل ساگیٹا کو “بغیر کسی مزاحمت کے” اپنی تحویل میں لے لیا ہے۔

تاہم امریکی فوجی کمانڈ کی جانب سے یہ واضح نہیں کیا گیا کہ آیا اس بار بھی گزشتہ قبضوں کی طرح امریکی کوسٹ گارڈ نے جہاز کا کنٹرول سنبھالا ہے یا نہیں۔