پنجاب کی وزیر اطلاعات عظمیٰ بخاری نے وزیر اعلیٰ پنجاب مریم نواز کے پہناوے پر تنقید کرنے والے سوشل میڈیا صارفین کو کھری کھری سنا دیں۔
گزشتہ دنوں مریم نواز کے بیٹے جنید صفدر کی شادی کی تقریبات منعقد ہوئیں، جن کے حوالے سے سوشل میڈیا پر خاصی چہ مگوئیاں اور چرچے دیکھنے میں آئے۔ مہندی، شادی اور ولیمے کی تقریبات کی تصاویر سامنے آنے کے بعد مریم نواز کے لباس پر جہاں بعض افراد نے تعریف کی، وہیں کچھ صارفین نے تنقید بھی کی۔
اسی تناظر میں پنجاب حکومت کے آفیشل انسٹاگرام پیج پر عظمیٰ بخاری کا ایک ویڈیو بیان جاری کیا گیا، جس میں انہوں نے ناقدین کو آڑے ہاتھوں لیا اور سوشل میڈیا پر ہونے والی تنقید کا بھرپور جواب دیا۔
عظمیٰ بخاری نے کہا کہ مریم نواز کے بارے میں بکواس کی جا رہی ہے کہ وہ اتنا تیار تھیں کہ دلہن لائم لائٹ میں نہیں آ سکی، حالانکہ حقیقت یہ ہے کہ جب مریم نواز عام دنوں میں بغیر کسی خاص تیاری کے دفتر آتی ہیں تو وہ تب بھی لائم لائٹ میں ہی ہوتی ہیں۔
وزیر اطلاعات پنجاب کا کہنا تھا کہ اصل مسئلہ یہ ہے کہ کچھ لوگوں کو مریم نواز سے جلن ہے کہ وہ اچھی کیوں دکھتی ہیں، اللہ نے انہیں اچھا بنایا ہے، اب اس میں کیا کیا جا سکتا ہے۔
عظمیٰ بخاری نے مزید کہا کہ جنید صفدر کی شادی الحمداللہ ٹاپ آف دی ٹاؤن تھی۔ شادی بیاہ کے مواقع پر ہر گھر میں روایت ہوتی ہے کہ اپنی استطاعت اور حیثیت کے مطابق گھر والے اور دوست احباب لباس تیار کرواتے ہیں تاکہ سب خوشی کے موقع پر اچھے انداز میں شریک ہو سکیں۔
انہوں نے کہا کہ جب انہوں نے سوشل میڈیا پر بدتمیزی اور تنقید کا طوفان دیکھا تو یہ سوچ کر افسوس ہوا کہ کتنے بدقسمت لوگ ہیں، 70 سال کی عمر میں شیروانی پہن کر کوئی دلہا بن سکتا ہے، اس کا فوٹو شوٹ ہو سکتا ہے، تو مریم نواز اپنے جوان بیٹے کی شادی پر تیار کیوں نہیں ہو سکتیں؟
