لاہور: وزیراعلیٰ پنجاب مریم نواز نے صوبے بھر میں تمام فائر سسٹمز کے آڈٹ کا اعلان کر دیا ہے۔
فائر سسٹمز کے آڈٹ سے متعلق بات کرتے ہوئے وزیراعلیٰ پنجاب نے کہا کہ اس مقصد کے لیے نئے ایس او پیز تیار کیے جائیں گے اور فائر سیفٹی سسٹمز کو مزید مضبوط بنایا جائے گا تاکہ آگ لگنے کے واقعات کی مؤثر روک تھام ممکن ہو سکے۔
مریم نواز نے کہا کہ سرکاری دفاتر ہوں، اسپتال، اسکول یا نجی ادارے، جہاں کہیں بھی شارٹ سرکٹ یا آگ لگنے کا خدشہ موجود ہے وہاں مکمل اور جامع جانچ کی جائے گی تاکہ ممکنہ خطرات کو بروقت روکا جا سکے۔
وزیراعلیٰ پنجاب کا کہنا تھا کہ انسانی جانوں کے تحفظ کے لیے فائر سیفٹی کے نظام کو بہتر بنانا حکومت کی اولین ترجیحات میں شامل ہے اور اس ضمن میں کسی قسم کی کوتاہی برداشت نہیں کی جائے گی۔
