غزہ: اسرائیلی بمباری کے نتیجے میں شدید سردی کا شکار فلسطینیوں کی مشکلات میں مزید اضافہ ہو گیا ہے۔
رپورٹس کے مطابق غزہ میں شدید سردی کے باعث 7 ماہ کی شیر خوار بچی جاں بحق ہو گئی، جبکہ موسم سرما میں بنیادی سہولیات سے محروم لاکھوں فلسطینی خیموں میں رہنے پر مجبور ہیں۔ اب تک شدید سردی کی وجہ سے جاں بحق بچوں کی تعداد 9 تک پہنچ گئی ہے۔
دوسری جانب اسرائیلی فوج کی جانب سے غزہ میں جنگ بندی کی خلاف ورزیاں بھی جاری ہیں۔ رپورٹ کے مطابق جنوبی غزہ میں اسرائیلی زیرِ قبضہ علاقے میں توسیع کی گئی، جبکہ خان یونس کے شمال مشرقی علاقوں سے فلسطینیوں کو نکلنے کا حکم دے دیا گیا ہے۔
اس صورتحال کے بیچ بین الاقوامی تعلقات میں بھی پیش رفت ہو رہی ہے، اور متحدہ عرب امارات نے امریکی صدر ڈونلڈ ٹرمپ کی غزہ امن بورڈ میں شمولیت کی دعوت قبول کر لی ہے۔
