کوئٹہ سمیت بلوچستان کے مختلف علاقوں میں بارش اور برفباری سے سردی میں اضافہ ہوگیا ہے۔
زیارت، کوژک ٹاپ، پرانا چمن اور شیلاباغ میں برفباری ریکارڈ کی گئی، جس کے باعث سردی کی شدت میں نمایاں اضافہ ہوا۔ کوژک ٹاپ پر شدید برفباری کے باعث چمن، کوئٹہ اور کراچی کو ملانے والی شاہراہ پر ٹریفک متاثر رہی، جس سے مسافروں اور مال بردار گاڑیوں کو مشکلات کا سامنا کرنا پڑا۔
نیشنل ہائی وے اتھارٹی (این ایچ اے) کے مطابق شاہراہ کو بحال رکھنے کے لیے ہیوی مشینری کے ذریعے برف ہٹانے کا کام جاری ہے، جبکہ ڈرائیورز کو محتاط رہنے اور غیر ضروری سفر سے گریز کی ہدایت کی گئی ہے۔
اس کے علاوہ چمن میں گرج چمک کے ساتھ موسلادھار بارش اور طوفانی ہواؤں کے باعث نشیبی علاقے زیر آب آ گئے ہیں، جس سے معمولات زندگی متاثر ہوئے ہیں۔ مقامی انتظامیہ کا کہنا ہے کہ نکاسی آب کے لیے اقدامات کیے جا رہے ہیں۔
ادھر خیبرپختونخوا، گلگت بلتستان اور آزاد کشمیر میں بھی بارش اور برفباری کا سلسلہ جاری ہے۔ محکمہ موسمیات نے آج بالائی خیبرپختونخوا، گلگت بلتستان اور کشمیر میں تیز بارش اور پہاڑوں پر برفباری کی پیشگوئی کی ہے، جس کے باعث فلیش فلڈ کا خطرہ بھی موجود ہے۔ اسلام آباد، پنجاب اور سندھ کے مختلف علاقوں میں بھی وقفے وقفے سے بارش کا امکان ظاہر کیا گیا ہے۔
دوسری جانب محکمہ موسمیات کے مطابق کراچی میں آج دوپہر سے شام تک بارش کا امکان ہے، جس سے موسم خوشگوار ہونے کے ساتھ ساتھ ٹریفک کی روانی متاثر ہونے کا خدشہ بھی ہے۔
نیشنل ڈیزاسٹر مینجمنٹ اتھارٹی نے شمالی علاقہ جات میں بارش اور برفباری کے پیش نظر ندی نالوں میں طغیانی کے خدشے کا الرٹ جاری کرتے ہوئے متعلقہ اداروں کو الرٹ رہنے کی ہدایت کی ہے۔
