کراچی: ڈپٹی کمشنر ساؤتھ جاوید نبی کھوسو نے بتایا ہے کہ گل پلازہ میں ملبے کے نیچے ممکنہ لاشوں کو نکالنے کے لیے سرچ آپریشن جاری ہے۔
میڈیا سے گفتگو کرتے ہوئے ڈی سی ساؤتھ نے کہا کہ گل پلازہ میں اب تک 55 سے 60 افراد جاں بحق ہوئے ہیں، جن میں سے 48 افراد کے پوسٹ مارٹم مکمل ہو چکے ہیں جبکہ 86 افراد تاحال لاپتا ہیں۔
ڈپٹی کمشنر کے مطابق ملبے کے نیچے ممکنہ لاشوں کی تلاش کے لیے مشینری کا استعمال عارضی طور پر روک دیا گیا ہے، کیونکہ مشینری کے استعمال سے عمارت کے گرنے کا خطرہ ہے۔ ریسکیو اہلکار دوبارہ عمارت میں داخل ہو گئے ہیں اور پورے پلازہ کی دوبارہ سرچنگ کی جا رہی ہے۔ ملبے کے گرنے والے حصوں میں فی الحال سرچنگ نہیں کی جا سکتی، لیکن ملبہ ہٹنے کے بعد وہاں سرچ آپریشن شروع کیا جائے گا۔
ڈی سی نے بتایا کہ جاں بحق افراد اور اہلخانہ کے ڈی این اے سیمپلز لیے جا رہے ہیں، تاہم کچھ اعضا ایسے ہیں جن کا ڈی این اے لینا مشکل ہے۔
انہوں نے مزید کہا کہ عمارت کے دروازے کیوں بند تھے اس کی تحقیقات جاری ہیں اور مختلف افراد کے بیانات قلمبند کیے جا چکے ہیں۔ اس کے علاوہ، جن عمارتوں میں فائر سیفٹی انتظامات موجود نہیں تھے، ان کے خلاف نوٹس جاری کیے جا رہے ہیں۔ فائر سیفٹی کے فقدان پر اب تک 6 عمارتوں کو نوٹس جاری کیے گئے ہیں۔
