ترکیہ نے غزہ میں فوج تعینات کرنے پر آمادگی کا اظہار کر دیا ہے، جسے عالمی سطح پر امن کے لیے اہم پیش رفت قرار دیا جا رہا ہے۔
ڈیوس میں ورلڈ اکنامک فورم کے موقع پر ایک خصوصی انٹرویو میں ترکیہ کے وزیر خارجہ ہاکان فیدان نے کہا کہ ترکیہ امن منصوبے کے تحت غزہ میں فوجیوں کی تعیناتی کے لیے تیار ہے۔
ہاکان فیدان نے کہا کہ جس طرح ترکیہ پہلے ہی بورڈ آف پیس کا حصہ بن چکا ہے، اسی طرح اب وہ غزہ سے متعلق ایگزیکٹو کمیٹی میں بھی فعال کردار ادا کر رہا ہے اور انسانی امداد میں نمایاں تعاون فراہم کر رہا ہے۔
ترکیہ کے وزیر خارجہ نے مزید کہا کہ ان کا ملک غزہ امن منصوبے میں ہر ممکن تعاون کے لیے تیار ہے اور وہ بین الاقوامی استحکام فورس کا حصہ بننے کے لیے بھی رضامند ہے۔
ہاکان فیدان نے واضح کیا کہ غزہ میں پائیدار امن کے قیام کے لیے ہر ممکن اقدام پر غور کیا جائے گا اور ترکیہ اس سلسلے میں عالمی کمیونٹی کے ساتھ بھرپور تعاون کرے گا۔
