ضلع خیبر کے وادی تیراہ میں حالیہ شدید برفباری کے باعث پھنسے ہوئے آئی ڈی پیز کی محفوظ مقامات پر منتقلی کے لیے ریسکیو آپریشن جاری ہے۔
ڈپٹی کمشنر خیبر بلال شاہد کے مطابق ضلعی انتظامیہ کی نگرانی میں بروقت اقدامات کیے گئے جس کے نتیجے میں تمام متاثرہ خاندان محفوظ رہے۔ امدادی سامان کی کھیپ رات کے وقت پائندہ چینہ پہنچا دی گئی، اور پھنسے ہوئے خاندانوں کو اسکول اور ہاسٹل میں منتقل کر دیا گیا۔ متاثرہ خاندانوں کو کمبل فراہم کیے گئے جبکہ بچوں میں سویٹرز اور دیگر ضروری اشیاء تقسیم کی گئیں۔
ڈپٹی کمشنر نے بتایا کہ صوبائی حکومت، پاک فوج اور فرنٹیئر کور کی بروقت امدادی کارروائیوں کے باعث نقل مکانی کرنے والے تمام خاندانوں کو فوری ریلیف فراہم کیا گیا۔ امدادی سرگرمیاں علاقہ ننگروسہ سے دوہ توئی اور دوہ توئی سے لرباغ تک جاری رہیں، جبکہ دیگر شاہراہوں پر کلیرنس آپریشن اب بھی جاری ہے۔
ریسکیو ٹیموں کی زیرِ نگرانی پہلے بچوں اور خواتین اور بعد میں مردوں کو محفوظ مقامات پر منتقل کیا گیا۔
ڈپٹی کمشنر نے بتایا کہ برفباری کا سلسلہ تاحال جاری ہے، جس کے باعث حفاظتی نقطہ نظر سے نقل مکانی کا عمل عارضی طور پر معطل کر دیا گیا ہے۔ ضلعی انتظامیہ نے کہا ہے کہ صورتحال پر مسلسل نظر رکھی جا رہی ہے اور موسم بہتر ہوتے ہی امدادی و نقل مکانی کی سرگرمیاں دوبارہ شروع کی جائیں گی۔