چترال کے علاقے ڈومیل میں ایک گھر پر برفانی تودہ گرنے کے نتیجے میں 9 افراد جاں بحق ہوگئے۔ واقعے کے بعد علاقے میں غم اور افسوس کی فضا قائم ہے۔
ڈی سی آفس چترال کے مطابق ڈومیل میں ایک رہائشی گھر پر برفانی تودہ گرا، جس کے نتیجے میں 9 افراد جاں بحق جبکہ ایک بچہ زخمی ہوا ہے۔ ریسکیو ٹیموں نے موقع پر پہنچ کر امدادی کارروائیاں انجام دیں۔
ڈی سی آفس کا کہنا ہے کہ جاں بحق ہونے والوں میں 4 خواتین اور 5 مرد شامل ہیں۔ تمام جاں بحق افراد کی لاشیں ملبے سے نکال لی گئی ہیں، جبکہ زخمی بچے کو طبی امداد فراہم کی جا رہی ہے۔
واضح رہے کہ ضلع خیبر کی وادی تیراہ میں حالیہ شدید برفباری کے باعث پھنسے ہوئے آئی ڈی پیز کی محفوظ مقامات پر منتقلی کے لیے ریسکیو آپریشن جاری ہے۔ خراب موسمی حالات کے باوجود امدادی سرگرمیاں جاری ہیں۔
ڈپٹی کمشنر خیبر بلال شاہد کے مطابق ضلعی انتظامیہ کی نگرانی میں بروقت اقدامات کیے گئے، جس کے نتیجے میں تمام متاثرہ خاندان محفوظ رہے اور کسی جانی نقصان کی اطلاع نہیں ملی۔
