حیدرآباد کے قریب مہران ہائی وے پر گاڑی اور ٹرک کے درمیان خوفناک تصادم کے نتیجے میں 8 افراد جاں بحق ہو گئے، جب کہ 2 افراد زخمی ہوئے ہیں۔
ایس ایس پی کے مطابق حادثہ اس قدر شدید تھا کہ گاڑی مکمل طور پر تباہ ہو گئی۔ جاں بحق افراد میں 2 مرد، ایک خاتون، 3 بچیاں اور 2 بچے شامل ہیں، جس کے باعث ایک ہی خاندان کے متاثر ہونے کا خدشہ ظاہر کیا جا رہا ہے۔
پولیس حکام کے مطابق حادثے کے فوراً بعد امدادی کارروائیاں شروع کر دی گئیں۔ لاشوں اور زخمیوں کو فوری طور پر قریبی اسپتال منتقل کیا گیا، جہاں زخمیوں کو طبی امداد فراہم کی جا رہی ہے۔ زخمیوں کی حالت کے بارے میں مزید تفصیلات کا انتظار کیا جا رہا ہے۔
ایس ایس پی نے بتایا کہ حادثے میں ملوث ٹرک کے ڈرائیور کو حراست میں لے لیا گیا ہے، جب کہ واقعے کی قانونی کارروائی بھی شروع کر دی گئی ہے۔ پولیس کے مطابق ابتدائی طور پر حادثے کی وجہ معلوم نہیں ہو سکی، تاہم مختلف پہلوؤں سے تفتیش جاری ہے تاکہ اصل حقائق سامنے آ سکیں۔
پولیس حکام کا کہنا ہے کہ تفتیش مکمل ہونے کے بعد حادثے کی وجوہات اور ذمہ داری کا تعین کیا جائے گا، جبکہ جاں بحق افراد کے لواحقین سے بھی رابطہ کیا جا رہا ہے۔
