خیبرپختونخوا کے ضلع ڈیرہ اسماعیل خان میں امن کمیٹی کے سربراہ نور عالم محسود کے گھر ہونے والے خودکش دھماکے میں 3 افراد جاں بحق جبکہ 7 زخمی ہو گئے ہیں۔
پولیس کے مطابق یہ دھماکا ڈیرہ اسماعیل خان کے علاقے قریشی موڑ کے قریب اس وقت ہوا جب نور عالم محسود کے گھر شادی کی تقریب جاری تھی۔ دھماکا انتہائی شدت کا تھا جس کے باعث موقع پر افراتفری پھیل گئی۔
ضلعی پولیس افسر کے مطابق خودکش دھماکے میں 3 افراد موقع پر ہی جاں بحق ہو گئے جبکہ 7 افراد زخمی ہوئے۔ پولیس کا کہنا ہے کہ دھماکے کے فوراً بعد فائرنگ کی آوازیں بھی سنی گئیں۔ تمام زخمیوں کو فوری طور پر ڈی ایچ کیو ٹراما سینٹر منتقل کیا گیا جہاں انہیں طبی امداد فراہم کی جا رہی ہے۔
ڈی ایس پی نے بتایا کہ زخمیوں میں امن کمیٹی کے سربراہ نور عالم محسود بھی شامل ہیں، جن کی حالت کے بارے میں ڈاکٹرز مسلسل نگرانی کر رہے ہیں۔
دوسری جانب وزیراعلیٰ خیبرپختونخوا سہیل آفریدی نے ڈی آئی خان میں ہونے والے خودکش دھماکے کی شدید مذمت کی ہے۔ انہوں نے آئی جی پولیس سے واقعے کی تفصیلی رپورٹ طلب کرتے ہوئے زخمیوں کو بہترین ممکنہ طبی سہولیات فراہم کرنے کی ہدایت کی۔
وزیراعلیٰ نے کہا کہ یہ واقعہ انتہائی افسوسناک اور قابل مذمت ہے، ملوث عناصر کو کسی صورت نہیں بخشا جائے گا اور انہیں کیفر کردار تک پہنچایا جائے گا۔ انہوں نے مزید کہا کہ صوبائی حکومت شہدا کے لواحقین کے غم میں برابر کی شریک ہے۔
