کراچی میں جرائم کا سلسلہ تھم نہ سکا، ڈاکو ایک پیٹرول پمپ سے لاکھوں روپے لوٹ کر فرار ہوگئے۔ پولیس کے مطابق یہ واقعہ کراچی کے علاقے کورنگی سنگر چورنگی کے قریب پیش آیا جہاں مسلح ڈاکوؤں نے پیٹرول پمپ پر ڈکیتی کی واردات انجام دی۔
پولیس کا کہنا ہے کہ ڈاکو پیٹرول پمپ سے 33 لاکھ روپے نقدی چھین کر فرار ہوگئے۔ واردات کے بعد پولیس نے موقع پر پہنچ کر شواہد اکٹھے کیے اور مقدمہ درج کرلیا ہے، جبکہ ملزمان کی تلاش کے لیے مختلف مقامات پر چھاپے مارے جا رہے ہیں۔
پولیس کے مطابق پیٹرول پمپ کا کیشیئر رقم بینک میں جمع کروانے کے لیے نکلا تھا، تاہم اس کے ساتھ کوئی سکیورٹی گارڈ موجود نہیں تھا۔ اسی دوران ڈاکوؤں نے موقع سے فائدہ اٹھاتے ہوئے رقم لوٹ لی اور فرار ہونے میں کامیاب ہوگئے۔
علاقہ مکینوں کا کہنا ہے کہ کورنگی اور اطراف کے علاقوں میں اسٹریٹ کرائم کی وارداتوں میں مسلسل اضافہ ہو رہا ہے، جبکہ شہری عدم تحفظ کا شکار ہیں۔ شہریوں نے مطالبہ کیا ہے کہ پولیس گشت میں اضافہ کیا جائے اور جرائم پیشہ عناصر کے خلاف مؤثر کارروائی کی جائے۔
پولیس حکام کا کہنا ہے کہ واقعے کی مزید تحقیقات جاری ہیں اور جلد ملزمان کو گرفتار کرلیا جائے گا۔
