اقوام متحدہ میں پاکستان کے مستقل مندوب عاصم افتخار نے مسئلہ فلسطین کو مشرق وسطیٰ میں عدم استحکام کی بنیادی وجہ قرار دیا۔
انہوں نے سلامتی کونسل میں مشرق وسطیٰ کی صورتحال پر خطاب کرتے ہوئے غزہ میں جنگ بندی کی مسلسل خلاف ورزیوں پر شدید تشویش کا اظہار کیا۔ عاصم افتخار نے غزہ میں حملے، جبری نقل مکانی اور تباہی کو ناقابل قبول قرار دیتے ہوئے یو این تنصیبات اور یو این آر ڈبلیو اے پر حملوں کی مذمت کی۔
پاکستانی مندوب نے کہا کہ سلامتی کونسل کی قرارداد 2803 کے تحت امن منصوبے پر عملدرآمد ضروری ہے۔ انہوں نے مستقل جنگ بندی، انسانی امداد اور غزہ کی فوری تعمیر نو کا مطالبہ کیا اور کہا کہ فلسطینی ریاست کا قیام ناگزیر ہے، جس کا دارالحکومت القدس الشریف ہونا چاہیے اور 1967 سے قبل کی سرحدوں پر خودمختار فلسطینی ریاست قائم کی جائے۔
عاصم افتخار نے سلامتی کونسل میں خطاب کے دوران واضح کیا کہ فلسطینی عوام کے ساتھ پاکستان کی یکجہتی غیر متزلزل ہے۔ انہوں نے اسرائیل سے شام اور لبنان میں غیر قانونی کارروائیاں فوری بند کرنے کا بھی مطالبہ کیا۔
