14 سال بعد پاکستان اور بنگلادیش کے درمیان براہ راست فضائی رابطہ بحال
14 سال کے بعد پاکستان اور بنگلادیش کے درمیان براہ راست فضائی رابطہ دوبارہ بحال ہو گیا ہے۔ بنگلادیش کی قومی ائیرلائن بیمان کی پہلی پرواز ڈھاکا سے کراچی ائیرپورٹ پر لینڈ کر گئی۔ پرواز کی آمد پر خصوصی انتظامات کیے گئے اور اسے واٹر سلیوٹ پیش کیا گیا۔
بیمان ائیرلائن کی آمد پر کراچی ائیرپورٹ پر ایک خصوصی تقریب کا بھی اہتمام کیا گیا، جس میں گورنر سندھ، بنگلادیشی ہائی کمشنر اور ائیرپورٹ حکام نے شرکت کی۔ اس موقع پر جذباتی مناظر بھی دیکھنے میں آئے، اور پاکستان میں موجود بنگالی کمیونٹی نے خوشی کا اظہار کیا کہ اب وہ کم خرچ میں اپنے پیاروں سے ملنے بنگلادیش جا سکیں گے۔
خیال رہے کہ ڈھاکا اور کراچی کے درمیان براہ راست پرواز کا دورانیہ تقریباً 3 گھنٹے ہے۔ براہ راست پروازیں بند ہونے کی وجہ سے بنگلادیش جانے والے مسافروں کو پہلے دبئی کے راستے طویل اور مہنگا سفر کرنا پڑتا تھا۔
