بھارت میں بڑھتی ہوئی فضائی آلودگی نے ٹی ٹوئنٹی ورلڈ کپ اور دیگر کرکٹ میچز سے قبل کھلاڑیوں کو ماسک پہننے پر مجبور کر دیا ہے۔
بھارتی میڈیا کے مطابق رانجی ٹرافی کے میچ میں کھلاڑی ماسک پہن کر کھیلتے رہے، اور ممبئی اور دہلی کے درمیان ہونے والے میچ میں بھی کھلاڑی آلودگی کے خطرے کے پیش نظر ماسک پہن کر میچ میں حصہ لے رہے تھے۔
ممبئی کے باندرا کُرلا کمپلیکس میں ہونے والے میچ میں ممبئی کے کھلاڑیوں نے ماسک پہن کر کھیل کھیلا۔ بھارتی میڈیا کا کہنا ہے کہ گراؤنڈ کے ساتھ جاری تعمیراتی کاموں نے آلودگی میں مزید اضافہ کیا ہے۔
آلودگی میں اضافہ ہونے کی وجہ سے ممبئی کے بیٹرز سرفراز خان، مشیر خان اور ہمانشو سنگھ نے میچ کے دوران ماسک پہن کر حصہ لیا۔ علاوہ ازیں، ممبئی کی فضائی آلودگی غیر تسلی بخش قرار دی گئی، اور ایئر کوالٹی انڈیکس 160 ریکارڈ کیا گیا۔
واضح رہے کہ ممبئی میں ٹی ٹوئنٹی ورلڈ کپ کے سیمی فائنل سمیت گروپ میچز بھی شیڈول ہیں، جس سے کھلاڑیوں اور شائقین کے لیے صحت کے خطرات بڑھ گئے ہیں۔
