پاکستان کے قوانین واضح طور پر اجازت دیتے ہیں کہ ایسے سرکاری ملازمین کے خلاف فوجداری کارروائی کی جائے جن کی غفلت کے نتیجے میں انسانی جان یا املاک کا نقصان ہو۔ تاہم ان قوانین پر عمل درآمد نہ ہونے کے باعث کراچی کے گل پلازہ میں آگ لگنے اور لاہور میں مین ہول کے واقعات جیسے بڑے سانحات بار بار پیش آئے ہیں۔
سرکاری ذرائع کے مطابق پاکستان پینل کوڈ (PPC) اور سول سرونٹس ایکٹ 1973ء کے تحت سرکاری ملازمین کو ایسی صورت میں کوئی استثنیٰ حاصل نہیں ہوتا جب غفلت یا قانونی فرائض کی انجام دہی میں ناکامی کے باعث اموات واقع ہوں یا املاک کو نقصان پہنچے۔ تعزیراتِ پاکستان کے تحت جلد بازی یا غفلت کے باعث کسی کی موت واقع ہونا قابلِ سزا جرم ہے، جس کی سزا قید، جرمانہ یا دونوں ہو سکتی ہیں۔
ذرائع کے مطابق یہ قانونی دفعات ہر شخص پر لاگو ہوتی ہیں، جن میں سرکاری ملازمین بھی شامل ہیں۔ جہاں مجرمانہ غفلت کے نتیجے میں موت واقع ہو، وہاں قانون نجی فرد اور سرکاری ملازم میں کوئی فرق نہیں کرتا، تاہم زیادہ تر معاملات میں متعلقہ افسران کو محض انتظامی انکوائری کے لیے معطل کر دیا جاتا ہے۔
یہ بھی واضح کیا گیا ہے کہ تعزیراتِ پاکستان ان صورتوں میں بھی لاگو ہو سکتی ہیں جہاں کوئی سرکاری ملازم جان بوجھ کر قانون کی خلاف ورزی کرے یا کسی غیر قانونی عمل میں سہولت فراہم کرے، جس کے نتیجے میں کسی کو نقصان یا موت واقع ہو۔
ذرائع کے مطابق سول سرونٹس ایکٹ 1973ء کے تحت سرکاری ملازمین ملک کے تمام قوانین کے تابع ہوتے ہیں، اور محکمانہ کارروائی فوجداری کارروائی کی راہ میں رکاوٹ نہیں بنتی۔ اسی طرح گورنمنٹ سرونٹس (کنڈکٹ) رولز 1964 کے تحت ہر سرکاری ملازم پر لازم ہے کہ وہ دیانت داری اور فرض شناسی کا مظاہرہ کرے اور کوئی ایسا کام نہ کرے جو اُس کے شایانِ شان نہ ہو۔
ذرائع کا کہنا ہے کہ عمارتوں کے تحفظ سے متعلق قوانین پر عمل درآمد میں ناکامی، خلاف ورزیوں کو نظر انداز کرنا یا غیر محفوظ استعمال کی اجازت دینا، سروس رولز کے تحت بدانتظامی کے ساتھ فوجداری جرم بھی بن سکتا ہے۔ محکمانہ کارروائی اور فوجداری مقدمہ دو الگ عمل ہیں اور دونوں بیک وقت چل سکتے ہیں۔ سپریم کورٹ کے متعدد فیصلوں کے مطابق جہاں کسی فوجداری جرم کا عنصر ثابت ہو، وہاں تادیبی کارروائی فوجداری مقدمے میں رکاوٹ نہیں بنتی۔
گل پلازہ کی عمارت میں مناسب فائر ایگزٹس، الارم سسٹمز اور ہنگامی تیاری موجود نہ ہونا بلدیاتی قوانین اور بلڈنگ کنٹرول ریگولیشنز کی خلاف ورزی ہے۔ ذرائع کے مطابق ان لازمی تقاضوں پر عمل درآمد میں ناکامی، خاص طور پر بار بار معائنوں یا عوامی شکایات کو نظر انداز کرنے کی صورت میں، مجرمانہ غفلت کے مترادف ہو سکتی ہے۔ لاہور کے مین ہول کے واقعے کو بھی مجرمانہ غفلت کا کیس قرار دیا جا رہا ہے، جس میں فوجداری اور انتظامی دونوں نوعیت کی کارروائی کی گنجائش موجود ہے۔
