کراچی کے علاقے صدر کی زینب النساء اسٹریٹ پر تاجر سے ڈکیتی کی واردات پیش آئی ہے۔ موٹرسائیکل سوار دو ڈاکو الیکٹرانکس کے تاجر سے 80 لاکھ روپے لوٹ کر فرار ہو گئے۔
ایس ایس پی ساؤتھ مہزور علی کے مطابق واردات میں ملوث ملزمان موٹرسائیکل پر سوار تھے اور اسلحے کے زور پر تاجر سے نقد رقم چھین کر فرار ہو گئے۔ پولیس حکام نے بتایا کہ متاثرہ تاجر صدر کے علاقے میں واقع ایک بینک سے رقم نکال کر موٹرسائیکل پر لے جا رہا تھا۔
پولیس کے مطابق یہ واردات گزشتہ شام پیش آئی، جس کے بعد واقعے کی رپورٹ درج کر لی گئی ہے اور ملزمان کی تلاش شروع کر دی گئی ہے۔ پولیس کا کہنا ہے کہ قریبی سی سی ٹی وی فوٹیجز کی مدد سے ملزمان کا سراغ لگانے کی کوشش کی جا رہی ہے۔
یاد رہے کہ دو روز قبل بھی کراچی کے علاقے کورنگی سنگر چورنگی کے قریب ایک پیٹرول پمپ سے ڈاکو لاکھوں روپے لوٹ کر فرار ہو گئے تھے۔ اس واقعے سے متعلق پولیس نے بتایا تھا کہ پمپ کا کیشیئر بینک میں رقم جمع کروانے کے لیے نکلا تھا، تاہم اس کے ساتھ کوئی سکیورٹی گارڈ موجود نہیں تھا۔
پولیس کے مطابق اسی دوران ڈاکوؤں نے موقع پا کر کیشیئر سے 33 لاکھ روپے چھینے اور فرار ہو گئے تھے، جس کے بعد شہریوں میں عدم تحفظ کا احساس مزید بڑھ گیا ہے۔
