ایران نے موجودہ کشیدہ حالات کے باوجود امریکا کے ساتھ مذاکرات کے سلسلے میں مثبت پیش رفت کی تصدیق کی ہے۔ ایرانی سپریم لیڈر کے مشیر علی لاریجانی نے سوشل میڈیا پر بیان میں کہا کہ جنگی فضا کے باوجود امریکا کے ساتھ بات چیت کے فریم ورک پر کام جاری ہے۔
لاریجانی نے کہا کہ مذاکرات کے عمل کے لیے عملی انتظامات آگے بڑھ رہے ہیں اور ساختی اقدامات میں پیش رفت ہو رہی ہے، جس سے یہ ظاہر ہوتا ہے کہ دونوں ممالک کے درمیان بات چیت کا عمل مؤثر انداز میں جاری ہے۔
یاد رہے کہ امریکا نے مشرق وسطیٰ میں اپنا بحری بیڑہ تعینات کر رکھا ہے اور امریکی صدر نے خبردار کیا ہے کہ جنگی جہاز تیزی سے ایران کی جانب بڑھ رہے ہیں۔ دوسری جانب ایران نے بھی امریکا کو کسی بھی جارحیت کی صورت میں سخت نتائج بھگتنے کی وارننگ دے رکھی ہے۔
مزید برآں، پاسداران انقلاب نے آج سے آبنائے ہرمز میں فوجی مشقوں کا اعلان کیا ہے، جس سے خطے میں کشیدگی برقرار ہے۔ ایران کا کہنا ہے کہ وہ اپنے دفاع اور علاقائی سلامتی کے لیے ہر ممکن اقدام کرے گا۔
