محکمہ کھیل حکومت بلوچستان کے زیراہتمام صوبہ بھر میں یوم پاکستان کی مناسبت سے جاری سپورٹس فیسٹیول میں کھیلوں کے مقابلوں کا سلسلہ زوروں پر ہے اور اس فیسٹیول کے تحت فٹسال ٹورنامنٹ، ووشو ٹورنامنٹ اور باسکٹ بال کے مقابلوں کا آغاز ہو چکا ہے۔
فٹبال ٹورنامنٹ کا افتتاح کوئٹہ کے علاقے سیٹلائٹ ٹاؤن میں کیو ڈی اے گراؤنڈ میں ہوا جہاں افتتاحی تقریب کے مہمان خصوصی پاکستان پیپلز پارٹی کے رہنما اور رکن اسمبلی پارلیمانی سیکرٹری میر لیاقت علی لہڑی تھے۔
اس موقع پر آرگنائزنگ کمیٹی کے ممبران عبدالباقی اور محمد صادق سمیت تماشائیوں کی بڑی تعداد موجود تھی۔مہمان خصوصی نے کھلاڑیوں سے تعارف کے بعد ٹورنامنٹ کا باقاعدہ آغاز کیا، فٹسال کے مقابلے 22 مارچ تک جاری رہیں گے۔ادھر، باسکٹ بال کے مقابلوں کا آغاز پاکستان سپورٹس بورڈ کوئٹہ سینٹر میں ہوا جس کا افتتاح بلوچستان اولمپک ایسوسی ایشن کے جنرل سیکرٹری شیر محمد ترین نے کیا۔
ان مقابلوں میں کوئٹہ کی 6 ٹیموں نے حصہ لیا، ووشو کے مقابلے ایوب سپورٹس کمپلیکس کے مارشل آرٹس جمنازیم میں شروع ہوئے جہاں 7 مختلف ویٹ کیٹیگریز میں کوئٹہ سے 35 کھلاڑی شریک ہیں۔افتتاحی تقریب کے موقع پر سپورٹس جرنلسٹس سے گفتگو کرتے ہوئے لیاقت علی لہڑی نے کہا کہ 23 مارچ یوم پاکستان کی مناسبت سے سپورٹس فیسٹیول کا انعقاد خوش آئند ہے۔
انہوں نے کہا کہ بلوچستان حکومت کھیلوں کے فروغ اور کھلاڑیوں کو مواقع فراہم کرنے کے لیے پرعزم ہے۔ ان کا کہنا تھا کہ کیو ڈی اے گراؤنڈ میں مصنوعی گراس لگانے کے منصوبے کو آئندہ مالی سال کے پی ایس ڈی میں شامل کیا جائے گا۔لیاقت علی لہڑی نے صوبے میں امن و امان کی مخدوش صورتحال کے باوجود تماشائیوں کی بڑی تعداد کی موجودگی کو قابل تحسین قرار دیا۔
انہوں نے کہا کہ نوجوانوں کو کھیلوں کی طرف راغب کیا جائے گا تاکہ وہ منشیات جیسی لعنت سے محفوظ رہیں اور کھیلوں کے ذریعے اپنے صوبے و ملک کا نام روشن کریں۔ انہوں نے علاقے میں مزید گراؤنڈز بنانے کا بھی عزم ظاہر کیا۔یہ سپورٹس فیسٹیول نہ صرف کھلاڑیوں کے لیے ایک پلیٹ فارم فراہم کر رہا ہے بلکہ قومی یکجہتی اور نوجوانوں میں مثبت سرگرمیوں کو فروغ دینے کا ذریعہ بھی بن رہا ہے۔
