لاہور قلندرز نے ڈیرن گف کی عدم دستیابی کے باعث نیا ہیڈ کوچ مقرر کر دیا۔
قلندرز نے جنوبی افریقا سے تعلق رکھنے والے رسل ڈومینگو کو پی ایس ایل 10 کے لیے ہیڈ کوچ مقرر کیا ہے۔لاہور قلندرز کے اعلامیے میں کہا گیا ہے یہ اعلان کرتے ہوئے خوشی ہو رہی ہے کہ معروف جنوبی افریقی کوچ رسل ڈومینگو کو پاکستان سپر لیگ کے دسویں ایڈیشن کے لیے ٹیم کا نیا ہیڈ کوچ مقرر کیا گیا ہے، وہ ڈیرن گف کی جگہ لیں گے جنہوں نے ناگزیر ذاتی وجوہات کی بنا پر دستیابی سے معذرت کر لی تھی۔
رسل ڈومینگو ایک انتہائی تجربہ کار کوچ ہیں جو اس سے قبل جنوبی افریقا اور بنگلا دیش کی قومی کرکٹ ٹیموں کے ہیڈ کوچ کے طور پر خدمات انجام دے چکے ہیں۔اعلامیے میں کہا گیا ہے کہ رسل ڈومینگو اپنی شاندار حکمت عملی اور نوجوان کھلاڑیوں کو نکھارنے کی صلاحیت کے لیے جانے جاتے ہیں، ان کی تقرری لاہور قلندرز کے ویژن سے مکمل طور پر ہم آہنگ ہے جو ایک مضبوط اور مسابقتی اسکواڈ بنانے پر مرکوز ہے۔
اس حوالے سے رسل ڈومینگو کا کہنا ہے میں لاہور قلندرز کے ساتھ 2025 کے پی ایس ایل سیزن کا حصہ بننے پر بے حد پرجوش ہوں، میں جلد از جلد کام شروع کرنے، کھلاڑیوں اور مینجمنٹ سے ملنے اور ایک شاندار سیزن کے لیے تیاریوں کا آغاز کرنے کا منتظر ہوں۔لاہور قلندرز اپنے سفر کا آغاز 11 اپریل کو راولپنڈی کرکٹ اسٹیڈیم میں اسلام آباد یونائیٹڈ کے خلاف ایک اہم میچ سے شروع کرے گی۔
