راولپنڈی میں مبینہ طور پر غیرت کے نام پر بھائی نے فائرنگ کرکے بہن سمیت دو افراد کو قتل کردیا، پولیس نے مقدمہ درج کرکے ملزم کی تلاش شروع کردی۔
پولیس کے مطابق راولپنڈی کے علاقے تھانہ دھمیال کی حدود میں مبینہ طور پر بھائی نے فائرنگ کرکے بہن سمیت 2 افراد کو قتل کردیا۔پولیس کا کہنا ہے کہ مقتولین کی شناخت حیدر اور کنول عرف لائبہ کے نام سے ہوئی ہے، دونوں لاشوں کو اسپتال منتقل کردیا گیا، مقدمہ درج کرکے ملزم کی گرفتاری کیلئے کوششیں شروع کردی گئیں۔
پولیس کا کہنا ہے کہ مقتول لڑکا کلر سیداں کا رہائشی تھا، لڑکی بھائی کے ساتھ رہائش پذیر تھی، مقتول نے لڑکی کا رشتہ بھی مانگا تھا مگر لڑکی والوں نے انکار کردیا تھا۔سی پی او راولپنڈی نے ملزم کی فوری گرفتاری کے احکامات جاری کرتے ہوئے ایس پی صدر کو فوری موقع پر پہنچنے کی ہدایت کردی اور واقعے کی تفصیل رپورٹ بھی طلب کرلی ہے۔
