اسلام آباد:نائب وزیر اعظم اسحاق ڈار نے سینیٹ اجلاس میں بتایا کہ حکومت نے سولر پینلز پر لگنے والے سیلز ٹیکس کو 18 فیصد سے کم کر کے 10 فیصد کرنے کا فیصلہ کیا ہے۔ انہوں نے کہا کہ سولر سسٹمز کے لیے 46 فیصد خام مال درآمد کیا جاتا ہے، اس لیے ٹیکس میں یہ کمی کی گئی ہے تاکہ اس شعبے کو فروغ ملے۔
اسحاق ڈار نے بتایا کہ پاکستان کی معیشت دن بہ دن مستحکم ہو رہی ہے اور حکومت نے بجٹ تجاویز پر اتحادیوں سے مشاورت جاری رکھی ہوئی ہے۔ انہوں نے کہا کہ ڈیجیٹل سروسز کے حوالے سے سیلز ٹیکس صوبوں کا حق ہوگا اور چاروں صوبوں میں پی آئی ڈی سی ایل منصوبے مکمل کرے گی۔اسحاق ڈار نے سندھ کی جامعات کے لیے فنڈز میں بھی اضافہ کرنے کا اعلان کیا اور کہا کہ سندھ کی یونیورسٹیز کو دی جانے والی رقم 2 ارب 60 کروڑ سے بڑھا کر 4 ارب 60 کروڑ کر دی گئی ہے۔
انہوں نے مزید کہا کہ مشرق وسطیٰ میں امن بہت ضروری ہے اور اسرائیل ایران تنازع کا پرامن حل نکالنا چاہیے۔ انہوں نے کہا کہ ایران اور اسرائیل کے درمیان جنگ کی شدت نہ صرف خطے بلکہ عالمی امن کے لیے بھی خطرہ ہے، اس لیے پاکستان سمیت تمام مسلم ممالک نے مشترکہ قرارداد منظور کی ہے تاکہ خطے میں امن و استحکام کو فروغ دیا جا سکے۔
