راولپنڈی : سنٹرل جیل راولپنڈی کے سپرنٹنڈنٹ کی جانب سے جاری کردہ وضاحتی بیان میں کہا گیا ہے کہ بانی پاکستان تحریک انصاف (پی ٹی آئی) کو جیل میں بی کلاس کے تحت تمام قانونی سہولیات فراہم کی جا رہی ہیں، جن میں خوراک، صحت، مطالعہ، اخبارات، ورزش اور چہل قدمی کی سہولیات شامل ہیں۔
بیان کے مطابق بانی پی ٹی آئی کو سات کمروں پر مشتمل علیحدہ کمپلیکس میں رکھا گیا ہے جہاں ایک کھلا صحن بھی موجود ہے تاکہ وہ روزانہ چہل قدمی اور ورزش کر سکیں۔ انہیں ورزش کے لیے ایکسرسائز سائیکل، LED، اور پسندیدہ اخبارات و کتب تک رسائی حاصل ہے۔ مزید برآں، ان کے کھانے کی تیاری کے لیے ایک قیدی کو بطور باورچی فراہم کیا گیا ہے جو ناشتہ، دوپہر اور رات کا کھانا ان کی ہدایت کے مطابق تیار کرتا ہے۔
جیل انتظامیہ کا کہنا ہے کہ بانی پی ٹی آئی جیل میں موجود کسی بھی قیدی کی نسبت زیادہ سہولیات حاصل کر رہے ہیں۔ واضح کیا گیا ہے کہ ان سہولیات میں سے بیشتر دیگر بی کلاس اسیران کو دستیاب نہیں ہیں۔مزید تفصیلات کے مطابق، جیل میں قید کے دوران بانی پی ٹی آئی نے اب تک 413 مرتبہ سوشل میڈیا پلیٹ فارم ٹویٹر کے ذریعے پیغامات جاری کروائے، جن میں پارٹی ورکرز کو سیاسی حکمت عملی، عام و ضمنی انتخابات، حکومتی مذاکرات اور 26ویں آئینی ترمیم سے متعلق رہنمائی شامل رہی۔
پریس ریلیز میں کہا گیا کہ اگست 2024 سے اب تک ان کے بیانات 145 مرتبہ قومی میڈیا میں نمایاں خبر بنے، جبکہ وہ 10 بین الاقوامی میڈیا اداروں کے ساتھ بھی براہ راست یا بالواسطہ گفتگو کر چکے ہیں، جن میں دی ٹیلی گراف، رائٹرز، فاکس نیوز اور دیگر ادارے شامل ہیں۔جیل انتظامیہ کے مطابق، گزشتہ تین ماہ میں بانی پی ٹی آئی سے 66 ملاقاتیں ہو چکی ہیں، جن میں ان کے پارٹی رہنما، وکلا اور اہل خانہ شامل ہیں۔ طبی سہولیات سے متعلق بتایا گیا کہ انہیں روزانہ تین بار ڈاکٹرز چیک کرتے ہیں اور حالیہ معائنے میں ان کی صحت مکمل طور پر تسلی بخش پائی گئی ہے۔
بیان کے اختتام پر جیل حکام نے سوشل میڈیا اور بعض سیاسی حلقوں کی جانب سے پھیلائی جانے والی خبروں کو من گھڑت اور بے بنیاد قرار دیتے ہوئے کہا کہ بانی پی ٹی آئی کو جیل میں مکمل سہولیات اور سکیورٹی فراہم کی جا رہی ہے، اور ان کے ساتھ کسی بھی قسم کا امتیازی سلوک نہیں برتا جا رہا۔
