کراچی: معروف اداکارہ حمیرا اصغر کی 8 جولائی 2025 کو کراچی میں کرائے کے فلیٹ سے تقریباً 10 ماہ پرانی لاش برآمد ہوئی، جس نے ان کی موت کو ایک پراسرار معاملہ بنا دیا تھا۔ تازہ معلومات کے مطابق، حمیرا اور مالک مکان کے درمیان کرایے کا تنازع کئی سالوں سے چل رہا تھا۔
دسمبر 2018 سے فلیٹ میں مقیم حمیرا نے کرایہ میں اضافہ قبول نہ کیا، جس کی وجہ سے 2019 سے 2023 کے دوران ان پر 5 لاکھ 35 ہزار روپے بقایاجات جمع ہو گئے۔ مالک مکان نے عدالت سے رجوع کیا لیکن اداکارہ نے کرایہ ادا نہیں کیا اور فلیٹ خالی نہیں کیا۔عدالتی حکم پر پولیس نے دروازہ توڑ کر فلیٹ میں داخل ہو کر حمیرا کی لاش دریافت کی۔ اہل خانہ کا کہنا ہے کہ حمیرا مالی طور پر خود کفیل تھیں، جس کی تصدیق پولیس نے بھی کی، تاہم کرایے کے بقایاجات کا تنازع اب بھی غیر واضح ہے۔
