ملک کو دیوالیہ ہونے سے بچایا، اگر پی ٹی آئی حکومت مزید چھ ماہ برقرار رہتی تو ملک ڈیفالٹ کر چکا ہوتا: اسحاق ڈار

نیویارک :نائب وزیر اعظم و وزیر خارجہ محمد اسحاق ڈار نے کہا ہے کہ موجودہ حکومت نے بروقت اقدامات کرتے ہوئے پاکستان کو دیوالیہ ہونے سے بچایا۔ ان کا کہنا تھا کہ اگر پی ٹی آئی حکومت مزید چھ ماہ برقرار رہتی تو ملک ڈیفالٹ کر چکا ہوتا۔

وہ نیویارک میں پاکستانی کمیونٹی سے خطاب کر رہے تھے۔ اس موقع پر انہوں نے کہا کہ حکومتی کوششوں سے معیشت میں نمایاں بہتری آئی ہے اور تین سال کے قلیل عرصے میں معاشی اشاریوں میں استحکام دیکھنے میں آیا ہے۔ ان کا کہنا تھا کہ عالمی مالیاتی ادارے بھی پاکستان کی معاشی بہتری کا اعتراف کر رہے ہیں۔اسحاق ڈار نے کہا کہ مہنگائی میں کمی اور زرمبادلہ کے ذخائر میں مسلسل اضافہ خوش آئند ہے۔ انہوں نے بتایا کہ حکومت کا طویل مدتی ہدف پاکستان کو دنیا کی 20 بڑی معیشتوں، یعنی جی 20 میں شامل کرنا ہے۔

وزیر خارجہ نے کہا کہ اوورسیز پاکستانی ملک کا قیمتی سرمایہ ہیں اور حکومت ان کے مسائل حل کرنے کیلئے کوشاں ہے۔ ان کے مطابق بیرون ملک مقیم پاکستانیوں کے اعتماد کی بحالی حکومت کی ترجیحات میں شامل ہے۔اسحاق ڈار نے کہا کہ پاکستان اس وقت سفارتی سطح پر متحرک کردار ادا کر رہا ہے۔ ان کا کہنا تھا کہ حالیہ دورہ امریکہ کے دوران امریکی وزیر خارجہ مارکو روبیو سے ہونے والی ملاقات انتہائی مفید رہی۔ انہوں نے کہا کہ پاکستان سلامتی کونسل کی صدارت کیلئے منتخب ہوا ہے، جو ملک کی بین الاقوامی سفارتی کامیابیوں کا مظہر ہے۔

وزیر خارجہ نے عافیہ صدیقی کو "پاکستان کی بیٹی” قرار دیتے ہوئے کہا کہ ان کی رہائی کیلئے امریکہ سے ہر ممکن رابطہ کیا گیا ہے، حتیٰ کہ صدر جو بائیڈن سے بھی معافی کی درخواست کی گئی ہے۔افغانستان کے حوالے سے انہوں نے کہا کہ ہمسایہ ملک سے تعلقات بہتر بنانے کیلئے بات چیت جاری ہے اور واضح پیغام دیا گیا ہے کہ افغان سرزمین پاکستان کے خلاف استعمال نہ ہو۔ انہوں نے کہا کہ پاکستان دہشت گردی کے مکمل خاتمے کیلئے پرعزم ہے۔

اسحاق ڈار نے کہا کہ پاکستان نے ہمیشہ بھارتی جارحیت کا مؤثر جواب دیا ہے۔ ان کے مطابق رافیل طیاروں کو مار گرانا اور "آپریشن بنيان مرصوص” جیسے اقدامات دشمن کو واضح پیغام دینے کیلئے کافی ہیں۔ انہوں نے کہا کہ سندھ طاس معاہدے کی معطلی کے بعد بھارت کیلئے فضائی حدود بند کی گئی، اور بھارت کی درخواست پر ہی جنگ بندی ممکن ہوئی۔وزیر خارجہ نے فلسطینی مسئلے پر پاکستان کا مؤقف دہراتے ہوئے کہا کہ پاکستان دو ریاستی حل کا حامی ہے اور فلسطینی عوام کے ساتھ یکجہتی کا اظہار کرتا ہے۔