راولپنڈی : وفاقی وزیر داخلہ محسن نقوی بلوچستان میں شہید ہونے والے میجر زیاد سلیم کی رہائش گاہ پہنچے اور شہید کے اہل خانہ سے ملاقات کی۔ انہوں نے شہید میجر کی والدہ، بہن، بھائیوں اور دیگر اہل خانہ سے گہرے رنج و غم کا اظہار کیا اور ان سے دلی ہمدردی کی۔
محسن نقوی نے شہید کے درجات کی بلندی اور اہل خانہ کے لیے صبر جمیل کی دعا کی۔ انہوں نے شہید کی والدہ، بہن اور بھائیوں کے حوصلے کو سراہتے ہوئے کہا کہ ایسی باہمت مائیں قوم کا فخر ہیں۔ ان کا کہنا تھا کہ شہداء کے اہل خانہ کی قربانیاں ناقابل فراموش ہیں اور پوری قوم ان کی مقروض ہے۔وزیر داخلہ نے شہید میجر زیاد سلیم کی قربانی کو خراج عقیدت پیش کرتے ہوئے کہا کہ ان کی شہادت کو ہمیشہ یاد رکھا جائے گا اور حکومت ان کے خاندان کا ہر ممکن خیال رکھے گی۔
اس موقع پر شہید کے بھائی نے میجر زیاد سلیم کا آخری آڈیو پیغام بھی وزیر داخلہ کو سنایا، جس سے فضا مزید غمگین ہو گئی۔ شہید کی والدہ نے گفتگو کرتے ہوئے بتایا کہ شہادت سے کچھ عرصہ قبل ہی ان کے بیٹے کی شادی ہوئی تھی، مگر وطن سے محبت ان کے لیے سب سے بڑھ کر تھی۔ انہوں نے بتایا کہ زخمی ہونے کے باوجود زیاد نے اپنے ساتھیوں کی جان بچانے کی بھرپور کوشش کی۔
شہید کی والدہ نے یہ عزم بھی ظاہر کیا کہ وہ ہمیشہ وطن اور افواج پاکستان کے ساتھ کھڑی رہی ہیں اور آئندہ بھی رہیں گی۔ واضح رہے کہ میجر زیاد سلیم کے والد، بریگیڈیئر سلیم، بھی 2005 میں وطن پر قربان ہو چکے ہیں۔ یہ خاندان وطن کے لیے دو نسلوں کی قربانی دینے والا ایک روشن نشان ہے۔
