لیہ:عوامی، سیاسی و صحافتی شخصیات کی بھرپور شرکت
لیہ (نیوز رپورٹر) تفصیلات کے مطابق جشن آزادی پاکستان کے حوالے سے چوک اعظم لیہ میں واقع جناح ہال میونسپل کمیٹی میں ایک پروقار تقریب کا انعقاد کیا گیا۔ تقریب کا اہتمام حقیقی پریس کلب کے زیرِ سرپرستی کیا گیا، جس میں صحافی برادری کے علاوہ سیاسی و سماجی شخصیات نے بھرپور شرکت کی۔
تقریب کے مہمانِ خصوصی اسسٹنٹ کمشنر و ایڈمنسٹریٹر چوک اعظم حارث حمید خان نیازی تھے، جبکہ معزز شرکاء میں چوہدری اعجاز گل، ملک ریاض گرواں، مقبول ہراج اور عبدالشکور سندھو شامل تھے۔ تقریب کا آغاز تلاوتِ قرآن پاک اور نعتِ رسولِ مقبول ﷺ سے کیا گیا۔ نظامت کے فرائض عبدالرؤف نفیسی نے سرانجام دیے۔ اس موقع پر مقررین نے یومِ آزادی کی اہمیت پر روشنی ڈالتے ہوئے کہا کہ پاکستان کا قیام بے شمار قربانیوں کا ثمر ہے۔ آزادی کوئی آسان تحفہ نہیں تھی، اس کی بنیادوں میں لاکھوں مسلمانوں کا خون شامل ہے۔
انہوں نے کہا کہ برصغیر کے مسلمانوں نے ہندو بنیے کے مظالم، قتل و غارت اور خواتین کی بے حرمتی جیسے ناقابلِ بیان سانحات برداشت کیے، تب جا کر ہمیں آزادی نصیب ہوئی۔ شرکاء نے کہا کہ علامہ اقبال اور قائداعظم محمد علی جناح کا خواب ایک ایسی اسلامی فلاحی ریاست کا قیام تھا جہاں انصاف، برابری، مذہبی آزادی اور ترقی سب کے لیے یکساں ہو۔
اس موقع پر خطاب کرتے ہوئے اسسٹنٹ کمشنر حارث حمید خان نیازی نے کہا کہ ہمیں 1947 کی قربانیوں کو کبھی فراموش نہیں کرنا چاہیے۔ قائداعظم کا یہ قول کہ "پاکستان اسی دن بن گیا تھا جس دن پہلا ہندو مسلمان ہوا تھا” ہماری قومی سوچ کی عکاسی کرتا ہے۔ انہوں نے مزید کہا کہ وطن کی ترقی، عوامی مسائل کا حل اور ریاست کی مضبوطی ہم سب کا فرض ہے۔ تقریب کے اختتام پر شرکاء نے اس عزم کا اظہار کیا کہ وہ وطنِ عزیز کی تعمیر و ترقی میں اپنا مثبت کردار ادا کرتے رہیں گے۔
