راولپنڈی : پاکستان کے 78ویں یومِ آزادی کے موقع پر فیلڈ مارشل سید عاصم منیر نے قوم کو خصوصی پیغام دیتے ہوئے تمام اہلِ پاکستان کو دل کی گہرائیوں سے مبارکباد پیش کی۔ انہوں نے وطن کی خاطر قربانیاں دینے والے بزرگوں اور برصغیر کے مسلمانوں کو خراج تحسین پیش کیا۔
فیلڈ مارشل نے کہا کہ پاکستان نہ صرف عالمِ اسلام کا ایک مضبوط اور ناقابلِ تسخیر قلعہ ہے بلکہ یہ بین المذاہب ہم آہنگی اور مذہبی آزادی کی روشن مثال بھی ہے، جہاں مذہبی اقلیتیں ملکی ترقی میں اہم کردار ادا کر رہی ہیں۔انہوں نے دہشتگردی کے خلاف پاکستان کی بے پناہ قربانیوں کا ذکر کرتے ہوئے پہلگام کے افسوسناک سانحے کی شدید مذمت کی اور شفاف عالمی تحقیقات کی پیشکش کی۔ فیلڈ مارشل نے بھارتی جارحیت کے خلاف آپریشن بُنْيَانٌ مَّرْصُوْص کی کامیابی کو پاک فوج کی بہادری اور ولولہ انگیز جذبے کی علامت قرار دیا۔
انہوں نے واضح کیا کہ پاک فوج روایتی، غیر روایتی اور ہائبرڈ خطرات سے نمٹنے کے لیے مکمل طور پر تیار ہے۔ ہم خطے میں امن، ترقی اور خوشحالی کے خواہاں ہیں، لیکن اپنی آزادی اور خودمختاری پر کبھی سمجھوتہ نہیں کریں گے۔ ملکی سالمیت کو نقصان پہنچانے کی کسی بھی مہم جوئی کا فوری اور منہ توڑ جواب دیا جائے گا۔فیلڈ مارشل نے مقبوضہ جموں و کشمیر کے مظلوم عوام کی حمایت جاری رکھنے کا عزم دہرایا اور کہا کہ کشمیریوں کو حقِ خود ارادیت دلانا مسئلے کا واحد منصفانہ اور پائیدار حل ہے۔ اس کے علاوہ، پاکستان فلسطین کے مظلوم عوام کے ساتھ کھڑا ہے اور عالمی برادری سے فلسطینی حقوق کے تحفظ کے لیے فوری اقدامات کی اپیل کی۔
انہوں نے یومِ آزادی کے موقع پر جدوجہد آزادی کے تمام شہداء کو سلام پیش کیا اور کہا کہ ان کی بہادری اور ایمان ہماری رہنمائی کا چراغ ہے۔ آخر میں انہوں نے کہا کہ پاک فوج کی پیشہ ورانہ مہارت اور جنگی تیاری پر مکمل اعتماد ہے اور وطن کی سرحدوں کی حفاظت کے لیے ہر قربانی دینے کو تیار ہیں۔
