اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے ملک کے مختلف حصوں خصوصاً پنجاب، خیبر پختونخوا اور بلوچستان کے کئی علاقوں میں موسلا دھار بارشوں اور سیلاب کے خدشات کے پیش نظر الرٹ جاری کر دیا ہے۔
این ڈی ایم اے کی رپورٹ کے مطابق شمالی خیبرپختونخوا کے چترال، دیر، سوات، کالام، بٹگرام، ایبٹ آباد اور ہری پور میں شدید بارشوں کی توقع ہے۔ ان پہاڑی علاقوں میں لینڈ سلائیڈنگ اور اچانک سیلابی صورتحال کا خطرہ موجود ہے۔اسی طرح مردان، صوابی، پشاور، چارسدہ، نوشہرہ، کوہاٹ اور ہنگو میں سیلاب کے امکانات ہیں جبکہ جنوبی خیبرپختونخوا کے بنوں، لکی مروت اور ڈی آئی خان میں بھی ندی نالوں میں طغیانی کی پیش گوئی کی گئی ہے۔ وزیرستان، کرم اور باجوڑ کے نچلے علاقوں میں بھی سیلاب کا خدشہ ہے۔
اسلام آباد اور راولپنڈی کے نشیبی علاقے ممکنہ شدید بارشوں کے باعث سیلاب سے متاثر ہو سکتے ہیں۔ اٹک، جہلم، چکوال، میانوالی، خوشاب اور سرگودھا میں بھی موسلا دھار بارش اور تیز ہواؤں کا امکان ہے۔پنجاب کے فیصل آباد، منڈی بہاؤالدین، گجرات، گوجرانوالہ، سیالکوٹ، حافظ آباد، نارووال، لاہور، قصور اور اوکاڑہ میں بھی شدید بارشوں کے باعث ندی نالوں میں طغیانی اور شہری علاقوں میں سیلابی صورتحال کی وارننگ دی گئی ہے۔دریائے جہلم کے بالائی علاقوں بشمول جہلم، پونچھ، مظفرآباد اور کانچی میں بھی شدید بارشوں کا امکان ہے، جس کے باعث دریائے راوی اور ستلج میں سیلابی صورتحال پیدا ہونے کا خدشہ ہے۔
بلوچستان کے کوئٹہ، ژوب، زیارت، لورالائی، قلات، نوشکی، برکھان، سبی، ڈیرہ بگٹی، سوئی، خاران، خضدار، آواران، واشک، تربت، ہنگول، ماڑہ اور گڈانی میں بھی وقفے وقفے سے بارش کی توقع ہے، اور ان علاقوں میں ندی نالوں میں سیلابی صورتحال کا خطرہ موجود ہے۔این ڈی ایم اے نے عوام کو ہدایت کی ہے کہ وہ غیر ضروری سفر سے گریز کریں، موسمی صورتحال سے آگاہ رہیں، اپنی گاڑیوں کو محفوظ جگہ پر کھڑی کریں اور درختوں، کمزور عمارتوں اور سائن بورڈز سے دور رہیں۔ مقامی انتظامیہ کی ہدایات پر عمل کریں اور حساس علاقوں میں احتیاط برتیں۔
مزید برآں، این ڈی ایم اے نے کہا ہے کہ ندی نالوں، پلوں اور پانی میں ڈوبی ہوئی سڑکوں سے گزرتے وقت بہت محتاط رہیں اور تیز پانی کے بہاؤ والے مقامات پر جانے سے گریز کریں۔
