کراچی میں صبح سویرے ہلکی بارش، آج اور کل گرج چمک کیساتھ تیز بارش کا امکان

کراچی سمیت ملک کے مختلف شہروں میں بارشوں کا سلسلہ جاری

کراچی میں علی الصبح ہلکی بارش کے بعد موسم خوشگوار ہوگیا۔ صدر، آئی آئی چندریگر روڈ، شاہراہِ فیصل، ڈیفنس اور کورنگی سمیت متعدد علاقوں میں بادل برسے، جبکہ یونیورسٹی روڈ، گلشن اقبال، محمود آباد اور منظور کالونی میں بھی بوندا باندی ہوئی جس کے باعث نشیبی مقامات پر پانی جمع ہونا شروع ہوگیا۔

محکمہ موسمیات نے پیشگوئی کی ہے کہ شہر میں اگلے دو روز کے دوران گرج چمک کے ساتھ موسلادھار بارش ہوسکتی ہے، جس سے اربن فلڈنگ کا خطرہ بڑھ سکتا ہے۔سندھ کے دیگر شہروں میں بھی موسمی سسٹم شدت اختیار کرگیا ہے۔ حیدرآباد، سجاول، ٹھٹھہ، سکھر اور نوشہرو فیروز سمیت کئی اضلاع میں تیز بارشیں ہوئیں، جبکہ تھرپارکر، عمرکوٹ اور سانگھڑ میں 10 ستمبر تک بارشوں کا سلسلہ جاری رہنے کا امکان ہے۔

ادھر پنجاب میں بھی بارشوں کا نیا سلسلہ متوقع ہے۔ لاہور، راولپنڈی، گجرات اور بہاولپور سمیت کئی شہروں میں بارش کی پیشگوئی کی گئی ہے۔ پی ڈی ایم اے کے مطابق جنوبی پنجاب کے سیلاب سے متاثرہ علاقوں میں بارشوں سے مشکلات مزید بڑھنے کا خدشہ ہے۔