ملک بھر میں آٹے کی قیمتوں میں ہوشربا اضافہ
اسلام آباد: پنجاب میں شدید بارشوں اور سیلاب کے باعث آٹے کی قیمتوں میں تیزی سے اضافہ دیکھنے میں آ رہا ہے۔ ادارہ شماریات کی 5 ستمبر تک کی رپورٹ کے مطابق صرف تین ہفتوں کے دوران 20 کلو آٹے کا تھیلا ایک ہزار 50 روپے تک مہنگا ہوا، جس کے بعد ملک میں آٹے کے 20 کلو تھیلے کی زیادہ سے زیادہ قیمت 2500 روپے تک جا پہنچی ہے۔
رپورٹ کے مطابق بنوں میں آٹا 1050 روپے، پشاور اور لاڑکانہ میں 900 روپے، سکھر میں 840 روپے، لاہور میں 830 روپے، ملتان میں 826 روپے، گوجرانوالہ اور سیالکوٹ میں 817 روپے، اسلام آباد میں 800 روپے جبکہ راولپنڈی اور کوئٹہ میں 740 روپے تک مہنگا ہوا۔
ادارہ شماریات نے بتایا کہ گزشتہ تین ہفتوں میں بہاولپور میں آٹے کے 20 کلو تھیلے کی قیمت 866 روپے 67 پیسے بڑھ گئی ہے۔ ماہرین کے مطابق سیلاب اور بارشوں کے باعث گندم کی ترسیل میں مشکلات اور اسٹاک میں کمی قیمتوں میں اضافے کی اہم وجہ ہیں۔
