لاہور: پنجاب حکومت نے سیلاب اور دیگر ہنگامی حالات میں ریسکیو آپریشنز کو مزید مؤثر بنانے کے لیے جدید ایئر لفٹ ڈرون حاصل کر لیا ہے۔ یہ ڈرون 200 کلوگرام وزن، یعنی ایک بالغ انسان کو اٹھا کر محفوظ مقام تک پہنچانے کی صلاحیت رکھتا ہے۔
پاکستان میں اپنی نوعیت کی یہ پہلی ایمرجنسی ایئر لفٹ سروس "پنجاب سول ڈیفنس ریزیلئنس کور” کے تحت استعمال میں لائی جا رہی ہے۔
سیکرٹری داخلہ پنجاب کے مطابق ڈرون کی ابتدائی ٹیسٹ فلائٹس لاہور میں کی گئیں، جس کے بعد اب اسے جنوبی پنجاب کے سیلاب متاثرہ علاقوں، خاص طور پر ملتان بھیجا جا رہا ہے۔ اس کے ذریعے پھنسے ہوئے افراد کو بروقت ریسکیو کیا جائے گا۔
انہوں نے بتایا کہ مستقبل میں مزید 10 ایئر لفٹ ڈرونز خریدنے کا فیصلہ کیا گیا ہے تاکہ سول ڈیفنس کو جدید ٹیکنالوجی سے لیس کیا جا سکے۔
سیکرٹری داخلہ نے سول ڈیفنس کے اہلکاروں اور رضاکاروں کو "فرنٹ لائن سولجرز” قرار دیتے ہوئے کہا کہ وہ انسانی جانیں بچانے کے لیے دن رات سرگرم ہیں۔ اس وقت سول ڈیفنس ریزیلئنس کور کے تحت شہریوں کی بطور رضاکار رجسٹریشن بھی جاری ہے تاکہ ہنگامی حالات میں عوامی تعاون کو مزید مضبوط بنایا جا سکے۔
