دوحہ/اسلام آباد: قطری وزیراعظم شیخ محمد بن عبدالرحمان الثانی نے کہا ہے کہ اسرائیلی حملے نے یرغمالیوں کی رہائی کی تمام امیدیں ختم کر دی ہیں۔
امریکی ٹی وی کو دیے گئے ایک انٹرویو میں قطری وزیراعظم نے واضح کیا کہ بین الاقوامی قوانین کی خلاف ورزی کرنے پر اسرائیلی وزیراعظم نیتن یاہو کو انصاف کے کٹہرے میں لایا جانا چاہیے۔ ان کا کہنا تھا کہ حماس پر اسرائیلی حملے کے بعد یرغمالیوں کا مستقبل تاریک ہوگیا ہے۔
واضح رہے کہ 9 ستمبر کو اسرائیل نے قطر کے دارالحکومت دوحہ پر فضائی حملہ کرکے مقبوضہ فلسطین کی مزاحمتی تنظیم حماس کی مرکزی قیادت کو نشانہ بنایا تھا۔ حماس کے مطابق حملے میں تنظیم کی مرکزی قیادت محفوظ رہی تاہم خلیل الحیہ کے بیٹے اور دفتر کے ڈائریکٹر سمیت 6 افراد شہید ہوگئے۔
قطری وزارت داخلہ نے بھی تصدیق کی کہ اسرائیلی فضائی حملے میں ایک قطری سکیورٹی افسر شہید اور ایک زخمی ہوا۔
