رحیم یار خان: وزیراعلیٰ پنجاب مریم نوازشریف نے سیلاب سے متاثرہ علاقوں کا دورہ کیا اور امدادی سرگرمیوں کا جائزہ لیا۔ اس موقع پر مقامی انتظامیہ نے انہیں سیلاب کی تازہ صورتحال پر بریفنگ دی۔
وزیراعلیٰ پنجاب نے متاثرہ خاندانوں سے ملاقات کی اور ان کے مسائل سنے۔ مریم نواز نے سیلاب متاثرین میں دودھ کے پیکٹس، کپڑے اور جوتے بھی تقسیم کیے۔ اس موقع پر انہوں نے تعلیم حاصل کرنے والے بچوں سے خصوصی ملاقات کی اور تحائف دیے۔
مریم نواز نے اعلان کیا کہ سیلاب متاثرین کے نقصانات کا مکمل ازالہ کیا جائے گا۔ انہوں نے متاثرین میں مالی امداد کے طور پر 10، 10 لاکھ روپے کے چیک تقسیم کیے جبکہ ایک متاثرہ شخص کو 20 لاکھ روپے کا چیک بھی دیا۔
وزیراعلیٰ پنجاب نے کہا کہ حکومت پنجاب سیلاب زدگان کو تنہا نہیں چھوڑے گی، متاثرہ خاندانوں کے نقصانات کا مکمل حساب لگاکر معاوضہ فراہم کیا جائے گا۔ انہوں نے امدادی اداروں کو ہدایت کی کہ ریلیف سرگرمیوں میں تیزی لائی جائے تاکہ متاثرین کو ہر ممکن سہولت فراہم ہو سکے۔
