اسلام آباد: پاکستان انٹرنیشنل ایئرلائن (پی آئی اے) نے اعلان کیا ہے کہ رواں ماہ پاکستان سے کینیڈا کے لیے فضائی آپریشن عارضی طور پر معطل کیا جا رہا ہے۔ ادارے کے مطابق یہ اقدام بحراوقیانوس کو پار کرنے والے خصوصی بوئنگ 777 لانگ رینج طیاروں کی لازمی مینٹیننس کے باعث کیا گیا ہے۔
پی آئی اے کے ترجمان کے مطابق یہ طیارے بغیر رکے مسلسل 17 گھنٹے پرواز کرنے کی صلاحیت رکھتے ہیں۔ ان طیاروں کو تقریباً تین ہفتوں کے لیے تکنیکی معائنے اور پرزہ جات کی تبدیلی کے عمل سے گزارا جائے گا تاکہ آئندہ دنوں میں متوقع مسافروں کے رش سے پہلے یہ مکمل طور پر تیار ہو سکیں۔
ترجمان نے وضاحت کی کہ یہ فیصلہ مسافروں کی حفاظت کو یقینی بنانے کے لیے کیا گیا ہے۔ انہوں نے کہا کہ پی آئی اے اپنے مسافروں کو ہونے والی تکلیف پر معذرت خواہ ہے تاہم مسافروں کی سلامتی اور طیاروں کی فٹنس ادارے کی اولین ترجیح ہے۔