اسلام آباد: وزارتِ توانائی نے ملک میں بجلی کی خرید و فروخت کے نئے طریقۂ کار کا اعلان کرتے ہوئے کہا ہے کہ حکومت اب اضافی بجلی نہیں خریدے گی بلکہ بڑے صارفین خود براہِ راست بجلی خرید سکیں گے۔ اس سلسلے میں وزارت نے ویلنگ نیلامی (Wheeling Auction) کے لیے تفصیلی گائیڈ لائنز جاری کر دی ہیں۔
گائیڈ لائنز کے مطابق بجلی کی مسابقتی مارکیٹ کی مدت پانچ سال کے لیے مقرر کی گئی ہے جس کے دوران مجموعی طور پر 800 میگاواٹ بجلی مارکیٹ میں نیلام کی جائے گی۔ بجلی کی قیمت روپے میں مقرر ہوگی جبکہ گرڈ چارجز اور سرچارجز علیحدہ لاگو ہوں گے۔ کامیاب شرکاء کو بولی کے چارجز کے ساتھ ساتھ گرڈ چارجز اور سرچارجز بھی ادا کرنا ہوں گے۔
اعلامیے میں کہا گیا ہے کہ آزاد مارکیٹ آپریٹر ہر سال نیلامی کیلنڈر جاری کرے گا جبکہ نیلامی کی تاریخوں میں تبدیلی صرف ناگزیر حالات میں کی جا سکے گی۔ بجلی کی قیمت کا تعین آزاد مارکیٹ میں طلب اور رسد کے مطابق کیا جائے گا اور حکومت اس میں براہِ راست مداخلت نہیں کرے گی۔
مزید برآں، نیلامی کمیٹی تمام موصولہ بولیوں کی جانچ پڑتال کے بعد اپنی رپورٹ آزاد مارکیٹ آپریٹر کو بھجوائے گی، جس کے بعد نیلامی کے نتائج کی حتمی منظوری نیپرا دو ہفتوں کے اندر دے گا۔وزارت توانائی کے مطابق اس نظام کے تحت بڑے صنعتی اور کمرشل صارفین کو بجلی خریدنے کا براہِ راست موقع ملے گا جبکہ حکومت پر اضافی بجلی خریدنے کا بوجھ کم ہوگا۔
