لاہور: پنجاب میں قدرتی آفات سے نمٹنے والے ادارے پی ڈی ایم اے نے کہا ہے کہ صوبے کے دریاؤں میں پانی کا بہاؤ بتدریج معمول کی سطح کی طرف آ رہا ہے، تاہم کچھ مقامات پر اب بھی سیلابی صورتحال برقرار ہے۔
پی ڈی ایم اے کے ڈائریکٹر جنرل عرفان علی کاٹھیا کے مطابق دریائے پنجند کے مقام پر اب بھی اونچے درجے کا سیلاب موجود ہے، جہاں پانی کا بہاؤ تقریباً 3 لاکھ 7 ہزار کیوسک ریکارڈ کیا گیا ہے۔ دریائے ستلج پر گنڈا سنگھ والا کے مقام پر درمیانے درجے کا سیلاب ہے اور پانی کا بہاؤ ایک لاکھ 8 ہزار کیوسک ہے، جبکہ ہیڈ سلیمانکی پر نچلے درجے کا سیلاب جاری ہے جہاں پانی کا بہاؤ 89 ہزار کیوسک ہے۔
انہوں نے بتایا کہ دریائے چناب، دریائے راوی اور پنجاب کے بڑے نالوں میں پانی کا بہاؤ اس وقت معمول پر ہے۔ عرفان کاٹھیا نے یقین دہانی کرائی کہ شہریوں کی جان و مال کے تحفظ کے لیے تمام ممکنہ وسائل بروئے کار لائے جا رہے ہیں۔پی ڈی ایم اے کی رپورٹ کے مطابق صوبے میں حالیہ بارشوں اور سیلاب کے نتیجے میں اب تک 104 افراد جاں بحق ہو چکے ہیں، جبکہ 45 لاکھ سے زائد افراد متاثر ہوئے ہیں۔ اس دوران 4700 سے زیادہ دیہات زیر آب آئے اور وسیع پیمانے پر مکانات اور فصلیں تباہ ہوئیں۔
ادارے نے مون سون بارشوں کے 11ویں سپیل کا الرٹ بھی جاری کر دیا ہے، جس کے مطابق 16 سے 19 ستمبر کے دوران دریاؤں کے بالائی علاقوں میں مزید بارشوں کا امکان ہے، جس سے پانی کی سطح میں دوبارہ اضافہ ہو سکتا ہے۔
