ایشیا کپ ٹی ٹوئنٹی کے سپر فور مرحلے میں پاکستان کو 6 وکٹوں سے شکست دینے کے بعد بھارتی کپتان سوریا کمار یادیو نے کہا ہے کہ اب پاکستان اور بھارت کے درمیان پرانی جیسی رقابت باقی نہیں رہی اور دونوں ملکوں کی دشمنی کا کوئی جواز نہیں بنتا۔
دبئی میں پریس کانفرنس کے دوران سوریا کمار یادیو نے کہا کہ گزشتہ 10 سے 15 میچوں میں بھارت نے ہی زیادہ کامیابیاں حاصل کی ہیں، پاک بھارت میچز میں بھارت کی جیت کا تناسب تقریباً 1-10 ہے، اس لیے لوگوں اور صحافیوں کو یہ سوال بار بار پوچھنا بند کر دینا چاہیے۔
انہوں نے میچ میں اپنی ٹیم کی کارکردگی پر بات کرتے ہوئے اعتراف کیا کہ فیلڈنگ میں کئی غلطیاں ہوئیں مگر آگے ابھی مزید اہم میچز باقی ہیں۔ کیچ چھوڑنے والوں پر طنز کرتے ہوئے انہوں نے کہا کہ لگتا ہے کیچ چھوڑنے والوں کے ہاتھوں میں مکھن لگا ہوا تھا، اسی لیے فیلڈنگ کوچ نے کیچ چھوڑنے والے کھلاڑیوں کو ای میل کے ذریعے طلب کیا ہے۔
بھارتی کپتان نے مزید کہا کہ دبئی کی وکٹ 14 ستمبر کے بعد سے کچھ آسان محسوس ہو رہی ہے اور اسی بنا پر بھارت نے پہلے فیلڈنگ کرنے کا فیصلہ کیا۔ ان کے مطابق میچ کا ٹرننگ پوائنٹ 10 اوورز کے بعد آیا جب بریک کے بعد بھارتی بولرز نے نیا انداز اپنایا۔ انہوں نے خاص طور پر بولر ڈوبے کے اسپیل کو فیصلہ کن قرار دیا جس میں پاکستانی بیٹرز دباؤ کا شکار ہو کر آؤٹ ہوئے۔
واضح رہے کہ ایشیا کپ کے سپر فور مرحلے کے دوسرے میچ میں بھارت نے پاکستان کو 172 رنز کا ہدف 19 ویں اوور میں 4 وکٹوں کے نقصان پر حاصل کر کے ٹورنامنٹ میں مسلسل دوسری کامیابی حاصل کی۔
