وفاق نے پیٹرولیم اسمگلنگ روکنے کیلئے صوبوں سے مدد مانگ لی
اسلام آباد: وفاقی حکومت نے پیٹرولیم مصنوعات کی اسمگلنگ کی روک تھام کے لیے صوبائی حکومتوں سے تعاون کی درخواست کر دی ہے۔ اس حوالے سے وفاق نے تمام صوبوں کو خط لکھ کر پیٹرولیم ترمیمی ایکٹ 2025 پر سختی سے عمل درآمد یقینی بنانے کی ہدایت کی ہے۔
حکومتی ذرائع کے مطابق خط میں کہا گیا ہے کہ پیٹرولیم ایکٹ 1934 میں کی گئی حالیہ ترمیم، یعنی پیٹرولیم ترمیمی ایکٹ 2025، پیٹرولیم شعبے کے ریگولیٹری فریم ورک میں اہم تبدیلیاں لاتی ہے تاکہ اسمگلنگ کو روکا جا سکے اور سپلائی چین کی شفافیت اور سالمیت برقرار رکھی جا سکے۔ وفاق نے واضح کیا ہے کہ اس ایکٹ پر موثر عملدرآمد کے لیے صوبوں کا کردار نہایت اہم ہے۔
